செருப்பில் கடத்தப்பட்ட தங்கம்... மடக்கிப் பிடித்த சுங்கத்துறையினர்..!

துபாயிலிருந்து சென்னை வந்த பயணி ஒருவர், செருப்பில் தங்கம் கடத்தி வந்ததைக் கண்டறிந்த சுங்கத்துறையினர், அதனைப் பறிமுதல் செய்து, கைது செய்தனர்.

சென்னை: பன்னாட்டு விமான நிலையத்திற்கு கொழும்பு மற்றும் துபாயில் இருந்து இரண்டு விமானங்கள் வந்தன.

விமானத்தில் வந்த பயணிகளை சுங்கத்துறை அலுவலர்கள் வழக்கம் போல் கண்காணித்தனர். அப்போது ஆறு பேரை சந்தேகத்தின் பேரில் நிறுத்தி விசாரித்தனர்.

விசாரணையின்போது முன்னுக்குப் பின் முரணாக பதிலளித்தால், அவர்களது உடைமைகளை சோதனை செய்தனர். அதில் ரூ. 5 லட்சத்து 17 ஆயிரம் மதிப்புள்ள எலக்ட்ரானிக் பொருட்கள் இருந்தன.

இதனைத் தொடர்ந்து ஆறு பேர் அணிந்திருந்த செருப்பு சற்று வித்தியாசமாக இருந்ததால் அவற்றை வாங்கி சோதித்தனர். அதில் தங்க கட்டிகளை மறைத்து வைத்து வந்ததைக் கண்டறிந்துள்ளனர்.

மேலும் அவர்களிடமிருந்து ரூ.40 லட்சத்து 28 ஆயிரம் மதிப்புள்ள, 928 கிராம் தங்கத்தை கைப்பற்றினார்கள். பின்னர் இது குறித்து அவர்களிடம் விசாரணை நடத்தி வருகின்றனர்.