பொருளாதார நிபுணர் நானி பல்கிவாலாவின் நூற்றாண்டு விழா சென்னையில் நடைபெற்றது. இந்நிகழ்ச்சியில் மத்திய நிதியமைச்சர் நிர்மலா சீதாராமன் கலந்துகொண்டார்.
அப்போது அவர் பேசுகையில், "ஐந்து டிரில்லியன் டாலர் பொருளாதாரம் என்ற இலக்கை அடைவதில் பல்வேறு சவால்கள் உள்ளன. நம் நாட்டுக்கு மிதமான வளர்ச்சித் தேவையில்லை; வேகமான மாற்றம் தேவை. அப்போதுதான் இளைஞர்களுக்கு நம்பிக்கை எழும். ஆறு ஆண்டுகாலமாக ஆட்சியிலிருந்து நீங்கள் (பாஜக அரசு) என்னென்ன மாற்றங்களைச் செய்தீர்கள் என்று கேட்கலாம்.
ஆனால், 2014ஆம் ஆண்டு பாஜக ஆட்சிக்கு வந்தபோது பல்வேறு சீர்திருத்த நடவடிக்கைகள் எடுக்க வேண்டியிருந்தது. அதனால்தான் தாமதம் ஏற்பட்டுள்ளது. நிலம் கையகப்படுத்துதலில் அரசு உறுதியான நடவடிக்கைகள் எடுக்கவில்லை என்று கூறுகிறார்கள். அது மாநில அரசின் கட்டுப்பாட்டில் உள்ளது. நாங்கள் சரியான முறையில் ஜிஎஸ்டியை அமல்படுத்தியுள்ளோம். மாநில அரசுகளுடன் இணைந்து இந்த மாற்றத்தை சாத்தியப்படுத்தியுள்ளோம்.
திவால் சட்டத்தின் மூலம் தொழில்களுக்கு புத்துயிர் கொடுத்துள்ளோம். ஆனால், திவால் சட்டத்தில் நிறுவனங்களின் செயல்பாட்டை நிறுத்த வசதி இருந்தாலும், நிறுவனங்களின் தலைமை பொறுப்பில் உள்ளவர்களை மாற்றி அதனைத் தொடர்ந்து செயல்படுத்துவதே திவால் சட்டத்தின் நோக்கம்" எனத் தெரிவித்தார்.
தொடர்ந்து அவர் பேசுகையில், பண மதிப்பிழப்பு நடவடிக்கையால் கருப்பு பணம் புழக்கத்தில் இருந்து வெளியே எடுக்கப்பட்டுள்ளது என்றார். அனைத்து மத்திய வங்கிகளும் ரூபாய் நோட்டின் காலகட்டத்தை பற்றி சிந்திக்கும் எனச் சொன்ன அவர், பெரும் மதிப்புடைய ரூபாய் நோட்டுகளின் மதிப்பு நீண்ட நாள்களுக்கு இருந்தததாகவும் சுட்டிக்காட்டினார்.
இதனால், ரூபாய் நோட்டுகள் வெளியே வராமல், பணப் பரிவர்த்தனைகள் சட்டவிரோதமாக நடத்தப்படுவதால் உள்நாட்டு மொத்த உற்பத்தி மதிப்பீடுகளும் குறைவாகத் தெரிந்தததாகவும் நிர்மலா சீதாராமன் எடுத்தியம்பினார்.
பண பரிவர்த்தனைகள் வங்கிகள் மூலம் நடைபெற வேண்டிய சூழ்நிலை இருந்தததாக தெளிவுபடுத்திய அவர், இதற்காகவே பண மதிப்பிழப்பு நடவடிக்கை மேற்கொள்ளப்பட்டதாகத் தெரிவித்தார். இதன் பலனாக நாட்டில் மின்னணு பணப் பரிவர்த்தனைகள் அதிகரித்தது என்றார். இதனை மிக விரைவில் மக்கள் ஏற்றுக்கொண்டதாகவும் அவர் குறிப்பிட்டார்.
இதையும் படிங்க:
