பள்ளி சாரா மற்றும் வயது வந்தோர் கல்வி இயக்ககத்தின் இயக்குநர் ராமேஸ்வர முருகன் அனைத்து மாவட்ட கல்வி அலுவலர்களுக்கும் அனுப்பியுள்ள கடிதத்தில், ”தமிழ்நாட்டில் 2011 மக்கள் தொகை கணக்கெடுப்பை அடிப்படையாகக் கொண்டு 15 வயதிற்கு மேற்பட்டவர்களில் எழுதவும் படிக்கவும் தெரியாவர்களுக்கு அடிப்படை எழுத்தறிவு வழங்குவதற்காக, ‘கற்போம் எழுதுவோம் இயக்கம்’ என்கிற புதிய வயது வந்தோர் கல்வித் திட்டம் செயல்படுத்தப்படவுள்ளது.
தமிழ்நாட்டில் கற்கும் பாரதம் திட்டத்தின் மூலம் ஒன்பது மாவட்டங்களில் 25 லட்சத்து 39 ஆயிரம் கல்லாதவர்களுக்கு அடிப்படை எழுத்தறிவு வழங்கப்பட்டுள்ளது. கடந்த 2011 மக்கள்தொகை கணக்கெடுப்பின்படி, மாநிலத்திலுள்ள அனைத்து மாவட்டங்களிலும் 15 வயதிற்கு மேற்பட்ட ஒரு கோடியே 24 லட்சம் பேர் முற்றிலும் எழுதவும், படிக்கவும் தெரியாதவர்களாக உள்ளனர். அவர்களில் 3 லட்சத்து 10 ஆயிரம் நபர்களுக்கு நவம்பர் 2020 முதல் பிப்ரவரி 2021க்குள் அடிப்படை எழுத்தறிவு கல்வி வழங்கிடும் நோக்கத்திற்காக ’கற்போம் எழுதுவோம் இயக்கம்’ என்கிற புதிய வயது வந்தோர் கல்வித் திட்டம் செயல்படுத்தப்படவுள்ளது.
இந்தத் திட்டத்திற்கு ஏற்கனவே மக்கள் தொகை கணக்கெடுப்பு பதிவேட்டின் அடிப்படையில் 15 வயதிற்கு மேற்பட்ட கல்லாதோரின் விவரங்களை அருகே உள்ள அரசு மற்றும் அரசு உதவி பெறும் பள்ளிகளின் தலைமை ஆசிரியரின் உதவியுடன் பெற வேண்டும். 100 நாள் வேலை திட்ட பணியாளர்களின் பதிவேடுகள், மகளிர் சுய உதவிக் குழு சார்ந்த பதிவேடுகள் மூலமும் கல்லாதோரின் விவரங்களை சேகரிக்க வேண்டும்.
அனைத்து அரசு, அரசு உதவி பெறும் தொடக்க மற்றும் நடுநிலைப்பள்ளிகள் கற்போர் கல்வியறிவு மையங்களாக செயல்படும். ஒவ்வொரு முயற்சிக்கும் குறைந்தபட்சம் 20 மற்றும் அதற்கு அதிகமான எண்ணிக்கையில் படிக்காதவர்களுக்கு அடிப்படை எழுத்தறிவு வழங்கிட நடவடிக்கை மேற்கொள்ள வேண்டும்.
கற்போர் கல்வி அறிவு மையங்கள் நவம்பர் 23ஆம் தேதி முதல் செயல்பட வேண்டும். கற்போர் கல்வி அறிவு மையத்தில் தன்னார்வலராக இணைந்து அடிப்படை எழுத்தறிவை கற்றுத் தருபவர்களுக்கு ஆட்சியரால் சான்றிதழ் வழங்கப்படும். கற்போர் கல்வி அறிவு மையம் ஒரு கல்வி ஆண்டில் நான்கு மாதங்கள் வீதம் மூன்று கட்டங்களாக பிரித்து செயல்படுத்தப்படும். அவற்றில் 120 மணி நேரம் கற்பித்தல் மற்றும் கற்றல் செயல்பாடுகள் நடைபெறும்.
நூறு நாள் வேலைத் திட்ட பணியாளர்கள் மகளிர் சுய உதவிக் குழு உறுப்பினர்கள் தொழிற்சாலை மற்றும் அரசு, அரசு சாரா பொதுப்பணித் துறையில் பணிபுரிபவர்கள் உள்ள படிக்காதவர்களுக்கு அவரவர் பணியிடத்திலேயே அவர்களுக்கு ஏதுவான நேரத்தில் பாடங்களை கல்வித் தன்னார்வலர்களின் மூலம் கற்பிக்க வேண்டும்.
மாவட்டக் கிளை சிறைச்சாலை மற்றும் மத்திய சிறைச்சாலை வளாகத்திலுள்ள முற்றிலும் எழுதவும் படிக்கவும் தெரியாத சிறைவாசிகளுக்கு இந்தத் திட்டத்தின் கீழ் அடிப்படை கல்வி வழங்கிட சிறை நிர்வாகத்தின் உதவியுடன் பணிகள் மேற்கொள்ள வேண்டும். கற்போர் கல்வி அறிவு மையங்களில் படிக்கும் அடிப்படை எழுத்தறிவு இல்லாதவர்களுக்கான தேர்வுகள் 2021 பிப்ரவரி மாதம் கடைசி வாரத்தில் நடத்தப்படும்” இவ்வாறு அதில் கூறப்பட்டுள்ளது.
இதையும் படிங்க:அரசு சார்பில் தனியார் பள்ளிகளுக்கு ஆண்டுக்கு ரூ. 400 கோடி... அரசு பள்ளிகளை ஏன் மேம்படுத்தக் கூடாது?
