சென்னை: இன்று சென்னை பல்கலைக்கழகத்தின் 164ஆவது பட்டமளிப்பு விழா பல்கலைக்கழக நூற்றாண்டு விழா அரங்கில் நடைபெற்றது. இதில், தமிழ்நாடு முதலமைச்சர் மு.க.ஸ்டாலின், ஆளுநர் ஆர்.என்.ரவி, உயர் கல்வித்துறை அமைச்சர் பொன்முடி, பெருநகர சென்னை மாநகராட்சி மேயர் ப்ரியா உள்பட பலரும் கலந்து கொண்டனர்.
இவ்விழாவில் பேசிய உயர் கல்வித்துறை அமைச்சர் பொன்முடி, “இந்தியாவின் தலைசிறந்த முதலமைச்சராக மு.க.ஸ்டாலின் உள்ளார். ஓராண்டு காலத்தில் சென்னை பல்கலைக்கழகத்தில் கொண்டு வந்துள்ள மாற்றங்கள் மற்றும் புதிய திட்டங்கள் குறித்து துணை வேந்தர் எடுத்துரைத்தார்.
இதற்கு நானோ, துணை வேந்தரோ காரணமல்ல. கல்வியும், சுகாதாரமும் எனது இரு கண்கள் என எங்களை வழிநடத்தும் முதலமைச்சர் தான் காரணம். பல அறிஞர்கள், குடியரசுத்தலைவர் இந்த பல்கலைக்கழகத்தில் படித்துள்ளனர் என்பதே பெருமையான ஒன்று தான். முதலமைச்சர் மு.க.ஸ்டாலின் கூட சென்னை பல்கலைக்கழகத்தில் பட்டம் பெற்றவர்தான். பல்வேறு புகழ்பெற்ற நபர்கள் சென்னை பல்கலைக்கழகத்தில் படித்துள்ளனர். நீட் மசோதாவை மத்திய அரசுக்கு அனுப்பி வைத்த ஆளுநர் ஆர்.என்.ரவிக்கு நன்றி.
கல்வி மாநில உரிமையில் இருக்க வேண்டும் என்பதை ஆளுநரிடம் கோரிக்கையாக வைத்திருக்கிறேன். கோச்சிங் மையங்கள் கொள்ளையடிப்பதற்கு வசதியாக நீட் உள்ளது. நீட் உள்ளிட்ட எந்த தேர்வாக இருந்தாலும், தனியார் பயிற்சி நிறுவனங்கள் கொள்ளை அடிப்பதற்குதான் வழி வகுக்கும்.
நீட் போன்ற நுழைவுத் தேர்வுகள் மாணவர்களுக்கு பயனளிக்காது. எந்த படிப்பாக இருந்தாலும் 12 ஆம் வகுப்பு மதிப்பெண் அடிப்படையில் மாணவர் சேர்க்கை தேவை. மாநிலத்தின் உரிமையாக கல்வி இருந்தால் பல்கலைக்கழகங்களில் கல்வி இன்னும் வளரும்” எனப் பேசினார்.
மேலும், இந்நிகழ்வில் கலந்து கொண்ட தமிழ்நாடு ஆளுநர் ஆர்.என்.ரவி, தமிழை பிற மாநிலங்களில் 3 வது மொழியாக்க முயற்சி செய்வேன் எனக் கூறியிருந்தார் என்பது குறிப்பிடத்தக்கது.
இதையும் படிங்க: பிற மாநிலங்களில் தமிழை 3ஆவது மொழியாக்க முயற்சி செய்வேன் - ஆர்.என்.ரவி பேச்சு
