இன்றைய காலகட்டத்தில் மனிதர்களின் சுகாதாரத்திற்கு மிகப்பெரிய அச்சுறுத்தலாக இருப்பது கொசுக்கள்தான். ஏனென்றால் அதன் மூலமாகவே டெங்கு, மலேரியா உள்ளிட்ட பல்வேறு நோய் தாக்குதல்கள் ஏற்பட்டு சுலபத்தில் மனிதர்கள் வயது வரம்புகள் இல்லாமல் உயிரிழந்து வருகின்றனர். கொசுக்களை ஒழிக்க பொது சுகாதரத் துறை, மருத்துவத் துறை, உள்ளாட்சித் துறை என பல்வேறு துறைகளும் ஏராளமான முயற்சிகள் மேற்கொண்டாலும், கொசுக்களின் உற்பத்தி அதிகரிக்கின்றதே தவிர குறைந்தபாடில்லை.
இந்நிலையில் கொசுக்களை வீடுகளிலும், பொது இடங்களிலும் ஒழித்துக்கட்ட முடியும் என சிறிய அளவிலான ஒரு தொழில்நுட்பத்தை ஓசூரைச் சேர்ந்த ஓய்வுபெற்ற அரசு அலுவலர் ஆறுமுகம் செயல்படுத்தியுள்ளார்.
கொசு மட்டை எனப்படும் மின்சார கொசுபேட் பயன்படுத்தி பெரும்பாலான வீடுகளில் கொசுக்களை உடனுக்குடன் கொல்வதை நாம் பார்க்க முடியும். அதனை யாரேனும் பயன்படுத்திக்கொண்டே இருந்தால் மட்டுமே அதில் கொசுக்களை கொல்ல முடியும் மற்ற நேரத்தில் வரும் கொசுக்களை யாரும் ஏதும் செய்ய முடியாத நிலைதான் உள்ளது.
ஆனால், ஆறுமுகத்தின் தொழில்நுட்பத்தில் மின்சாரக் கொசுபேட் தானாகவே கொசுக்களை கொன்று குவிக்கிறது. மின் கொசு மட்டையில் எப்போதுமே மின்சாரம் இருப்பதுபோல் உருவாக்கி அதன் எதிர் திசையில் சிறிய அளவிலான காற்றாடியை ( பேன்) இணைத்துள்ளார். மேலும் கொசு மட்டைக்கு முன்புறமாக கொசுக்களை அதிகம் ஈர்க்கும் சிறிய அளவில் மங்கலாக எரியும் நீளம் மற்றும் பச்சை நிற பல்புகளை எரிய விடுகிறார். அந்த ஒளியின் தன்மையால் கொசுக்கள் ஈர்க்கப்பட்டு இரவு முழுமையாக தன்னிச்சையாக கொசுக்களை கொல்ல முடியும் என செயல்படுத்தியும் காட்டுகிறார்.
மேலும் இந்த வழிமுறையை பயன்படுத்தி பொதுமக்கள் தங்களின் வீடுகளில் உள்ள கொசுக்களை எளிதில் கொல்ல முடியும் என்பதால், கொசுக்கள் மூலம் பரவும் உயிர்கொல்லி நோய்களுக்கு முற்றுப்புள்ளி வைக்க முடியும். இதன் தொழில்நுட்பத்தை பயன்படுத்தி பெரிய அளவிலான இயந்திரங்களை மக்கள் கூடும் பொது இடங்கள், கொசுக்கள் அதிகம் உள்ள பகுதிகள் மற்றும் அரசு அலுவலகங்களில் வைக்க மத்திய மாநில அரசுகள் முன்வர வேண்டும் என்றும் கோரிக்கை வைத்துள்ளார்.
இதையும் படிங்க: ஐந்தாம் வகுப்பு சிறுமியின் உயிரைப் பறித்த டெங்கு!
