வேலூர் மாவட்டத்தில் நடைபெற்ற வருமான வரிச்சோதனையில் அதிகளவிலான பணம் பறிமுதல் செய்யப்பட்டது. இந்நிலையில் அந்தத் தொகுதியில் தேர்தலை ரத்து செய்யக்கோரி தேர்தல் ஆணையம் குடியரசுத் தலைவருக்கு கோரிக்கை வைத்திருந்தது. நாளை மறுநாள் தமிழ்நாட்டில் உள்ள 38 தொகுதிகளுடன் சேர்த்து வேலூர் தொகுதிக்கும் வாக்குப்பதிவு நடைபெறவிருந்த நிலையில் இன்று மாலை தேர்தல் ரத்து அறிவிப்பு வந்துள்ளது அரசியல் அரங்கில் அதிர்ச்சியை ஏற்படுத்தியது.
இந்நிலையில் வேலூர் மக்களவை தேர்தல் ரத்து செய்யப்பட்டது குறித்து திமுக தலைவர் மு.க.ஸ்டாலின் தேர்தல் ஆணையத்தை வன்மையாகக் கண்டித்து அறிக்கை ஒன்றை வெளியிட்டுள்ளார். இதில், 'தேர்தல் பிரச்சாரம் முடிந்த நிலையில் வேலூர் நாடாளுமன்றத் தேர்தல் ரத்து என்று இந்திய தேர்தல் ஆணையம் அறிவித்திருப்பதற்கு திராவிட முன்னேற்றக் கழகத்தின் சார்பில் கடும் கண்டனத்தைத் தெரிவித்துக் கொள்கிறேன். தொடக்கத்திலிருந்தே தமிழகத்தில் தேர்தல் ஆணையம் என்ற ஒன்று செயல்படுகிறதா? என்ற கேள்வி அனைவருக்கும் எழுந்தது. அதிகாரிகள் மாற்றம் குறித்து தி.மு.க. கொடுத்த மனுக்கள் மீது எந்த நடவடிக்கையும் எடுக்கவில்லை. தேர்தல் டி.ஜி.பி மாற்றச் சொன்ன அதிகாரிகளைக் கூட மாற்றவில்லை.
தி.மு.க.வை குறி வைத்தே செலவினப் பார்வையாளர்கள் மற்றும் சிறப்பு செலவினப் பார்வையாளர்கள் சுற்றிச் சுற்றி வருகின்றனர். அ.தி.மு.க - பா.ஜ.க கூட்டணி வேட்பாளர்களின் முறைகேடுகள் பற்றி அவர்கள் கண்டுகொள்ளவே இல்லை. துணை முதலமைச்சர் திரு ஓ.பன்னீர் செல்வம் தொகுதியில் இரவு பகலாக தலா 1000 ரூபாய் விநியோகிக்கப்பட்டு - அதுகுறித்த வீடியோக்கள் வெளிவந்தும் தேர்தல் ஆணையம் ஓடி ஓளிந்து கொண்டது.
அ.தி.மு.க அமைச்சர்கள் பொறுப்பில் உள்ள தொகுதிகள் அனைத்திலும் ஒரு ஓட்டுக்கு 2 ஆயிரம் ரூபாய் வெளிப்படையாகவே வழங்கப்படுகிறது. வேலூர் தொகுதி தேர்தல் ரத்து அறிவிப்பு வெளிவந்த சில நிமிடங்களிலேயே திராவிட முன்னேற்றக் கழகத்தின் மகளிரணி செயலாளரும், தூத்துக்குடி நாடாளுமன்றத் தொகுதியின் வேட்பாளருமான கனிமொழி தூத்துக்குடியில் தங்கியிருக்கும் இல்லத்தில் வருமான வரித்துறை ரெய்டு நடத்திக் கொண்டிருப்பதாக செய்திகள் வருகின்றன.
பா.ஜ.க போட்டியிடும் தூத்துக்குடி தொகுதியில் பாஜக படுதோல்வி அடைந்துவிடும் என்கிற பயத்தால் திமுகவை குறிவைத்து இதுபோன்ற ரெய்டுகள் நடத்தி சீண்டிப் பார்க்க நினைப்பது, நாங்கள் அ.தி.மு.க - பா.ஜ.க.வில் இன்னொரு கூட்டணி கட்சி என்ற தோற்றத்தை காட்ட இந்திய தேர்தல் ஆணையம் முன்வந்திருப்பதாகவே கருதுகிறேன். இது ஒரு ஜனநாயகப் படுகொலை.
திரு டி.என். சேசன் போன்ற நேர்மையாளர்கள் தலைமை தேர்தல் ஆணையராக இருந்த புகழ்மிக்க இந்திய தேர்தல் ஆணையம் பிரதமர் நரேந்திர மோடி தலைமையிலான பா.ஜ.க ஆட்சியில் வரலாறு காணாத அளவிற்கு சந்தேகத்திற்குள்ளாகியிருப்பது இந்த 17 ஆவது நாடாளுமன்றத் தேர்தலில் நிகழ்ந்துள்ள மிகக்கேவலமான சாபக்கேடு.
தமிழகத்தில் பா.ஜ.க – அ.தி.மு.க கூட்டணிக்கு சிவப்புக் கம்பளம் விரித்து தேர்தல் முறைகேடுகளையும், பண விநியோகத்தையும் தாராளமாக செய்ய அனுமதித்து இவ்வளவு மோசமான தலைமைத் தேர்தல் அதிகாரியை இதுவரை தமிழகம் கண்டதில்லை. தேர்தலில் நடுநிலைமை என்ற தேர்தல் ஆணையக் கோட்பாடு பிரதமர் நரேந்திர மோடியின் காலில் பட்டு மிதிபட்டு கிடக்கிறது. இந்த அராஜகங்களின் மூலம் திராவிட முன்னேற்றக் கழகத்தை அசைத்துப் பார்க்கலாம், அதன்மீது மக்கள் வைத்திருக்கும் நம்பிக்கையை உரசிப் பார்க்கலாம் என நினைத்தீர்கள் என்றால் கடும் விளைவுகளை சந்திக்க நேரிடும். அதேபோல், ஜனநாயகத்தை காப்பாற்ற எங்களை வீதிக்கு வந்து போராடுகிற சூழலை நீங்களே உருவாக்கி விட வேண்டாம் என பகிரங்கமாக எச்சரிக்க விரும்புகிறேன்.
வேலூர் நாடாளுமன்றத் தேர்தல் எப்போது நடத்தப்பட்டாலும் வெற்றி பெறப்போவது திராவிட முன்னேற்றக் கழகம்தான். ஆனால், தேர்தலில் அனைத்துக் கட்சிகளுக்கும் “சம களம்” ஏற்படுத்திக் கொடுக்கும் பொறுப்புள்ள இந்திய தேர்தல் ஆணையம் இப்படி மத்தியிலும், மாநிலத்திலும் உள்ள ஆளுங்கட்சிக்கு “கூட்டாளியாக”ச் செயல்படுவதை இந்திய ஜனநாயகத்தில் நம்பிக்கையுள்ள எவராலும் ஏற்றுக்கொள்ள முடியாது. தேர்தல் ஜனநாயகத்தை பாதுகாத்திட இந்திய தேர்தல் ஆணையத்தின் தலைமை தேர்தல் ஆணையர், ஆணையர்கள் ஆகியோர் நியமனங்களிலும், மாநில தலைமை தேர்தல் அதிகாரி நியமனத்திலும் மிகக்கடுமையான சீர்திருத்தங்களை கொண்டுவர திராவிட முன்னேற்றக் கழகம் தீவிரமாக பணிகளைத் துவங்கும் - தேவைப்பட்டால் உச்சநீதிமன்றத்தை நாடவும் தயங்காது என்று தெரிவித்துக் கொள்ள விரும்புகிறேன்' என்று எச்சரிக்கை விடுத்துள்ளார்.
