சென்னை: இளைஞர்களுக்கு வேலைவாய்ப்பை உருவாக்குவது குறித்து, தொழிலாளர் நலத்துறை அமைச்சர் சி.வி. கணேசன், சென்னை தலைமை செயலகத்தில் செய்தியாளர்களை சந்தித்து பேசினார்.
அப்போது அவர் பேசுகையில், "தமிழ்நாட்டில் தொழிலாளர் நலன்களை பாதுகாக்க அரசு பல்வேறு நடவடிக்கைகளை எடுத்துவருகிறது. தொழிலாளர்கள் புகார் தெரிவிக்க, தனி தொலைபேசி எண்கள் கொடுக்கப்பட்டிருக்கின்றன. புகாரின் அடிப்படையில் உடனடி நடவடிக்கைகளும் மேற்கொள்ளப்பட்டு வருகின்றன.
90 ஐடிஐகள் புனரமைப்பு
தமிழ்நாட்டில் உள்ள 90 ஐடிஐக்களில், கடந்த பத்து வருடங்களாக எந்தவித புனரமைப்பு பணிகளும் நடைபெறவில்லை. இதனால் பாழடைந்த கட்டடங்களாக காட்சி அளிக்கும், ஐடிஐக்களை ஆய்வு செய்து புனரமைக்கும் திட்டம் குறித்து முதலமைச்சரிடம் அறிக்கை தாக்கல் செய்ய திட்டமிடப்பட்டுள்ளது.
தமிழ்நாட்டில் 15 அமைப்பு சாரா தொழிலாளர்கள் நல வாரியங்கள் உள்ளன. இதில் 5 வாரியங்களுடன் ஆய்வுக்கூட்டம் நடத்தப்பட்டு, உறுப்பினர்கள் நியமிக்கப்பட்டுள்ளனர். மற்ற வாரியங்களிலும் விரைவில் உறுப்பினர்கள் நியமனம் செய்யப்படவுள்ளனர்.
2,50,000ஆக குறைந்த எண்ணிக்கை
கரோனாவுக்கு முன்பு ஆண்டுக்கொரு முறை புதுப்பிக்கப்படவேண்டும் என்ற அடிப்படையில், 4 லட்சத்து 50 ஆயிரம் வெளிமாநில தொழிலாளர்கள் இணையதளம் மூலமாக பதிவு செய்து இருந்தனர்.
தற்போது கரோனாவால் பெரும்பாலான வெளிமாநில தொழிலாளர்கள் சொந்த ஊர்களுக்கு சென்றுவிட்டதால், இந்த எண்ணிக்கை 2 லட்சத்து 50 ஆயிரமாக குறைந்துள்ளது” என்றார்.
இதையும் படிங்க: விக்டோரியா மஹால் புனரமைப்பு - சென்னை மாநகராட்சி
