2011 முதல் 2018 வரையிலான 8 ஆண்டு காலத்துக்கான கலைமாமணி விருதுகள் வழங்கும் விழா தமிழ்நாடு முதலமைச்சர் எடப்பாடி பழனிசாமி தலைமையில் சென்னை கலைவாணர் அரங்கில் நடந்தது. இந்த விழாவில் சபாநாயகர் தனபால், தலைமை செயலர் சண்முகம், அமைச்சர்கள் திண்டுக்கல் சீனிவாசன், வேலுமணி, ஜெயக்குமார், கே.சி. வீரமணி, செங்கோட்டையன், செல்லூர் ராஜூ, உள்ளிட்ட பலர் பங்கேற்றனர். இதில் தமிழ்நாடு இயல், இசை, நாடக மன்ற தலைவர் இசையமைப்பாளர் தேவா உள்ளிட்டோர் கலந்துகொண்டனர்.
விழாவில் அமைச்சர் பாண்டியராஜன் பேசுகையில், சட்டச் சிக்கல் இருந்ததால் 8 ஆண்டுகளாக கலைமாமணி விருது வழங்கப்படவில்லை. உணவு பற்றி கவலைப்பட வேண்டாம். உணர்வு பற்றிதான் கவலைப்பட வேண்டும் என எம்.ஜி.ஆர் கூறியுள்ளார். சென்னைக்கு இசை நகரமாக யுனெஸ்கோ விருது வழங்கியுள்ளது என்றும் தெரிவித்தார்.
இதனையடுத்து, பேசிய முதலமைச்சர் பழனிசாமி, 'இன்று 201 கலைஞர்களுக்கு விருது அளிக்கப்படுகிறது. கலைமாமணி விருது 5 சவரனாக வழங்கப்படும். நலிந்த கலைஞர்களுக்கு வழங்கப்படும் உதவித் தொகை இரண்டாயிரம் ரூபாயிலிருந்து 3 ஆயிரம் ரூபாயாக உயர்த்தப்படும் என்றார்.
