ரோல் பால் உலகக்கோப்பை: மூன்றாவது சுற்றுக்கு முன்னேறியது இந்தியா..!

சென்னை: இந்தியாவில் நடைபெற்று வரும் உலகக்கோப்பை ரோல் பால் தொடரில் இந்திய அணி செனிகல் மற்றும் நியூசிலாந்து அணியை வீழ்த்தி மூன்றாவது சுற்றுக்கு முன்னேறியுள்ளது.

இந்தியாவின் ரோல் பால் கூட்டமைப்பு சார்பில் உலகக்கோப்பை 2019 போட்டிகள் நேற்றுமுன்தினம் தொடங்கி நவம்பர் 20ஆம் தேதி வரை, ஐசிஎப் உள்விளையாட்டு அரங்கம் மற்றும் சாந்தோம் சென்னை மாண்ட்போர்ட் உள்விளையாட்டு அரங்கத்தில் நடைப்பெற்று வருகிறது.

இப்போட்டியில் 27நாட்டை சேர்ந்த ஆண்கள் மற்றும் பெண்கள் அணிகள் பங்கேற்கின்றன, இதன் தொடக்க விழா சென்னை ஐசிஎப் உள்விளையாட்டு அரங்கில் நடைப்பெற்று போட்டிகள் தொடங்கியது.

சென்னையில் நடைப்பெற்ற 5ஆவது ரோல் பால் உலகக்கோப்பை போட்டியில் போட்டியை நடத்தும் இந்திய அணி, செனிகல் அணியை எதிர்கொண்டது. இதில் இந்தியா அணி 9-2 என்ற புள்ளி கணக்கில் செனிகல்-லை வீழ்த்தி வெற்றி பெற்றது.

அதனைத் தொடர்ந்து நேற்றைய நாளின் கடைசி போட்டியில் இந்திய அணி, நியூசிலாந்து அணியை எதிர்கொண்டது. இந்த போட்டியிலும் இந்திய அணி 10-0 என்ற புள்ளிக் கணக்கில் நியூசிலாந்து அணியை வீழ்த்தி அபார வெற்றி பெற்று மூன்றாவது சுற்றுக்கு முன்னேறியது.