சென்னை: முன்னாள் அமைச்சர் விஜயபாஸ்கருக்குச் சொந்தமான இடங்களில் நடத்திய சோதனையில் 4.87 கிலோ நகைகள், 24 லட்சம் ரூபாய் ஆகியவற்றை லஞ்ச ஒழிப்புத் துறை காவல் துறையினர் பறிமுதல்செய்துள்ளனர்.
வருமானத்திற்கு அதிகமாக 27 கோடியே 22 லட்சத்து 56 ஆயிரத்து 736 கோடி ரூபாய் சொத்துக்குவிப்பில் ஈடுபட்டதாக, அவர் மீதும், அவரது மனைவி ரம்யா மீதும் புதுக்கோட்டை வழக்குப்பதிவு செய்யப்பட்டது.
லஞ்ச ஒழிப்புத் துறை சோதனை குறித்து விஜயபாஸ்கர் நேற்று (அக்டோபர் 18) செய்தியாளரிடம் கூறுகையில், "இன்று (அக். 18) காலை 6.30 மணியிலிருந்து லஞ்ச ஒழிப்புத் துறை சார்பில் எனக்குச் சொந்தமான வீடு உள்ளிட்ட 50 இடங்களில் சோதனை நடைபெற்றுவருகிறது.
சென்னை கீழ்ப்பாக்கத்தில் நான் குடும்பத்துடன் வசித்துவரும் வீட்டிலும் சோதனையை லஞ்ச ஒழிப்புத் துறை அலுவலர்கள் நடத்தினர்கள். இந்தச் சோதனையில் எனது வீட்டில் இருந்து எந்தவிதமான பணம், நகை உள்ளிட்ட ஆவணங்களும் கைப்பற்றப்படவில்லை. எனது எல்லா சொத்துகளுக்கும் முறையான ஆவணங்கள் உள்ளன. அதைத் தேவைப்படும்போது காண்பிக்கத் தயாராக உள்ளேன்.
சட்ட ரீதியாகச் சந்திப்பேன்
என் மீதான சொத்துக்குவிப்பு வழக்கை சட்ட ரீதியாகச் சந்திக்கத் தயாராக உள்ளேன். மிகக் கடுமையான உழைப்பாளியான, என்னை ஊடகங்கள் தவறாகத் திரித்து வெளியிடுகின்றன. கடந்த 23 ஆண்டுகளாக அன்னை தெரசா என்ற அறக்கட்டளை நடத்திவருகின்றோம்.
கடந்த 18 ஆண்டுகளாக எனது சகோதரர்கள் கல்வி நடத்திவருகின்றார்கள். ஆனால், பதவிக்கு வந்தவுடன்தான் இவற்றைச் செய்வதாகத் தவறான செய்திகளைப் பரப்புகின்றனர்.
அவற்றை முதல் தகவல் அறிக்கையில் சேர்த்துள்ளனர். ஆனால், அதற்கான ஆவணங்கள் எல்லாம் முறையாக உள்ளன. எனது பரிவர்த்தனைகள் வருமான வரி செலுத்திவரும் ஆவணங்கள் உள்ளிட்ட அனைத்து விவரங்களும் முறையாகப் பராமரிக்கப்பட்டுவருகின்றன.
அதிமுகவிற்கு சோதனைக்காலம்
இது அதிமுகவினுடைய சோதனைக்காலம் என்பதால் இதுபோன்ற சோதனைகளை எதிர்கொண்டுவருகிறோம். இந்தச் சோதனைகள் தொடர்ச்சியாக நடைபெற்றுவந்தாலும் அதிமுகவினராகிய நாங்கள் மனம் கலங்கமாட்டோம்; பொதுவாழ்வில் பயணிக்கும் எங்களுக்குச் சோதனைகள் வழக்கமானவை.
சட்டத்தின்படி நடப்பவன் என்பதால், சோதனையின்போது முழு ஒத்துழைப்பு வழங்கினேன். அனைத்தையும் சட்டரீதியாக எதிர்கொள்வோம். சோதனை தொடரும் நிலையில், முழுமையாகப் பேச நான் விரும்பவில்லை.
தேர்தலின்பொழுது பிரமாண பத்திரத்தில் கொடுக்கப்பட்ட சொத்து விவரங்களை வைத்து, முதல் தகவல் அறிக்கையில் கொடுத்துள்ளனர்" என்று தெரிவித்தார்.
இதையடுத்து பேசிய வழக்கறிஞர் செல்வம், "லஞ்ச ஒழிப்புத் துறை அலுவலர்கள் கேட்கும் விவரங்களுக்கு முறையான ஆவணங்கள், கணக்கு காட்ட தயராக உள்ளோம். சட்டம் அனைவருக்கும் பொதுவானது" என்று தெரிவித்துள்ளார்.
இதையும் படிங்க: விஜயபாஸ்கர் வீட்டில் சுமார் ரூ.24 லட்சம் ரொக்கம், 4.8 கிலோ தங்க நகைகள் பறிமுதல் - லஞ்ச ஒழிப்புத்துறையினர் அதிரடி
