சென்னை: பல் மருத்துவ கவுன்சில் விதிகளின்படி, பல் மருத்துவ கல்லூரிகள், 10 கிலோ மீட்டர் சுற்றளவில் உள்ள அரசு மருத்துவமனைகளுடன் இணைக்கப்பட வேண்டும். இந்த விதிகளை மீறியதாகக் கூறி, திருநெல்வேலி மாவட்டம் காவல்கிணறு பகுதியில் உள்ள ராஜாஸ் பல் மருத்துவ கல்லூரியில் மாணவர் சேர்க்கைக்கு அனுமதி மறுத்ததுடன், மாணவர் சேர்க்கைக்கான கலந்தாய்வில் இருந்தும் கல்லூரி நீக்கப்பட்டது.
இதை எதிர்த்து ராஜாஸ் பல் மருத்துவ கல்லூரி சார்பில் வழக்கு தொடரப்பட்டது. அந்த மனுவில், "எங்கள் கல்லூரி 10 கிலோ மீட்டர் சுற்றளவில் உள்ள பூதப்பாண்டி அரசு மருத்துவமனையுடன் இணைக்கப்பட்டுள்ளது. ஆனால், மாநில - தேசிய நெடுஞ்சாலை மாற்றம் காரணமாக 16 கிலோ மீட்டர் தூரத்தில் அரசு மருத்துவமனை உள்ளதாக கூறி எங்கள் கல்லூரியின் மாணவர் சேர்க்கைக்கு அனுமதி மறுக்கப்பட்டுள்ளது" எனத் தெரிவிக்கப்பட்டது.
இந்த மனுவை விசாரித்த நீதிபதி தண்டபாணி, மனுதாரர் தரப்பு வாதத்தில் வலு உள்ளது எனக் கூறி மாணவர் சேர்க்கைக்கு அனுமதி மறுத்த உத்தரவுக்கு இடைக்கால தடை விதித்து உத்தரவிட்டார். மேலும் மனுவுக்கு பதிலளிக்கும்படி, ஒன்றிய அரசு, பல் மருத்துவ கவுன்சில், மருத்துவ பல்கலைக்கழகம், மாணவர் சேர்க்கை தேர்வுக்குழு ஆகியவைக்கு உத்தரவிட்டார்.
இதையும் படிங்க: ஷாப்பிங் மாலுக்கு மாநகராட்சி அலுவலர்கள் சீல்
