அதிகாரிகள் மீது கவுன்சிலர்கள் புகார்.. என்ன நடக்கிறது சென்னை மாநகராட்சியில்..?

சென்னை மாநகராட்சியில் ஆய்வுப் பணிகளின் போது சமூக ஆர்வலர்கள் என்ற பெயரில் சிலருக்கு அழைப்பு விடுப்பதாகவும், தாங்கள் புறக்கணிக்கப்படுவதாகவும் கவுன்சிலர்கள் புகார் தெரிவித்துள்ளனர்..

சென்னை: மாநகராட்சியில் மக்கள் பிரதிநிதிகளான கவுன்சிலர்கள் பதவியேற்று ஆறு மாதங்கள் நிறைவடைந்துள்ளது. தற்போதும் மாமன்ற உறுப்பினர்களுக்கு மாநகராட்சி அதிகாரிகள் உரிய ஒத்துழைப்பு வழங்குவதில்லை என சர்ச்சை தொடர்ந்து எழுந்து வருகிறது. கடந்த மாதம் நடைபெற்ற மாமன்ற கூட்டத்தின் போதும் ஏராளமான கவுன்சிலர்கள் மாநகராட்சி அதிகாரிகள் குறித்து புகார் தெரிவித்தனர்.

இந்நிலையில், இன்று நடைபெற்ற மாமன்றக் கூட்டத்தில் கூட்டத்தின் போது பேசிய 174வது வார்டு திமுக கவுன்சிலர் ராதிகா, பெசன்ட் நகர், சாஸ்திரி நகர் பகுதிகளில் வடிகால் பணிகள் நடைபெற்று வருகின்றன. இதுகுறித்து ஆய்வுக்கு வந்தபோது ஆணையர் தரப்பில் இருந்து எந்த தகவல்களும் தெரிவிக்கப்படவில்லை.

ஆனால் அதே பகுதியில் சமூக ஆர்வலர் எனப் பெயரில் உள்ள சிலருக்கு தகவல் அளிக்கப்படுகிறது. இதனால் மக்கள் மத்தியில் அவப்பெயர் ஏற்படும் சூழல் உருவாகிறது. மக்கள் பிரதிநிதிகளை புறக்கணித்து தனி நபர்களுக்கு முக்கியத்துவம் கொடுப்பது வருத்தம் அளிக்கிறது என தெரிவித்தார்.

அப்போது குறுக்கிட்ட துணை மேயர் மகேஷ்குமார், அதிகாரிகள் அவ்வப்போது பணிகளை ஆய்வு செய்வது அவசியம் தான். ஆனால் மக்கள் பிரதிநிதிகளுக்கு உரிய தகவல் தெரிவிக்காததால் தான் மக்கள் பிரதிநிதிகளுக்கு வருத்தம் ஏற்படுகிறது. இதனை தவிர்க்க வேண்டும் என தெரிவித்தார்.

குறிப்பிட்ட சம்பவம் குறித்து விளக்கமளித்த ஆணையர் ககன்தீப்சிங் பேடி, குறிப்பிட்ட பகுதிகளில் ஆய்வு சென்றபோது மண்டல தலைவருக்கு ஆய்வு சென்றபோது மண்டல தலைவருக்கு தகவல் தெரிவிக்கப்பட்டது. சமூக ஆர்வலர்கள் யாருக்கும் தகவல் தெரிவிக்கப்படவில்லை. அவர்களாகவே வந்திருக்க கூடும். மாநகராட்சியில் உள்ள அனைத்து அதிகாரிகளும் மக்கள் பிரதிநிதிகளுக்கு ஒத்துழைப்பு வழங்க வேண்டியது கட்டாயம் என விளக்கமளித்தார்.

தொடர்ந்து பேசிய மேயர் பிரியா, அதிகாரிகள் ஆய்வு செல்லும் போதும், வார்டுகளில் மேற்கொள்ளப்படும் பணிகள் நிலை குறித்த தகவல்களையும் மாமன்ற உறுப்பினர்களுக்கு தகவல் அளிக்க வேண்டும். ஏற்கனவே உறுப்பினர்களுக்கு ஒத்துழைப்பு வழங்க அனைத்து அதிகாரிகளுக்கும் அறிவுறுத்தப்பட்டுள்ளது.

உறுப்பினர்களுக்கு ஒத்துழைப்பு வழங்காத சம்பவம் மீண்டும் நடைபெற்றால் சம்பந்தப்பட்ட அதிகாரிகள் மீது துறை ரீதியாக நடவடிக்கை எடுக்கப்படும் என எச்சரிக்கை விடுத்து விவாதத்தை முடித்து வைத்தார். இதுவரை மாநகராட்சி அதிகாரிகள் மீது கவுன்சிலர்கள் புகார் தெரிவித்து வந்த நிலையில், ஆணையர் ககன்தீப்சிங் மீதே கவுன்சிலர் ஒருவர் அதிருப்தி தெரிவித்துள்ளது என்பது குறிப்பிடத்தக்கது.

இதையும் படிங்க:ராஜினாமா செய்து விட்டு கழகப் பணி ஆற்றுவோம் என்றேன்... யாரும் முன்வரவில்லை... ஓ. பன்னீர்செல்வம்...