சென்னை: கொளத்தூர் சட்டப்பேரவைத் தொகுதிக்குட்பட்ட திரு.வி.க நகர் மண்டலம், கொளத்தூர் பள்ளி சாலையில் உள்ள சென்னை ஆண்கள் மேல்நிலைப் பள்ளியில், இன்று (அக்.16) தமிழ்நாடு முதலமைச்சர் மு.க.ஸ்டாலின் கலைஞரின் வருமுன் காப்போம் திட்டத்தின் கீழ் சிறப்பு மருத்துவ முகாமை தொடங்கி வைத்தார்.
இந்த மருத்துவ முகாம்களின் மூலம் பொது மருத்துவம், பொது அறுவை சிகிச்சை , குழந்தைகள் நல மருத்துவம், மகப்பேறு மற்றும் பெண்கள் நல மருத்துவம், கண் மருத்துவம், காது, மூக்கு, தொண்டை மருத்துவம் போன்ற 17 வகையான சிறப்பு மருத்துவர்களால் நோயை கண்டறிந்து, பொது மக்களுக்கு அதற்கான சிகிச்சை அளிக்கப்படும்.
மருத்துவ முகாம்களின் மூலம் பொதுமக்கள் தாங்கள் வசிக்கும் பகுதிக்கு அருகே, நோய்க்கான ஆரம்ப நிலையிலேயே சிகிச்சைக்கான ஆலோசனைகளை பெற இயலும்.
முகாமில் 35 மருத்துவர்கள், 60 செவிலியர்கள், 3 மருந்தாளுநர்கள், 20 மருத்துவ ஊழியர்கள் மற்றும் 4 தொழில்நுட்ப வல்லுநர்கள் உள்ளிட்டோர் பொதுமக்களுக்கு சிகிச்சை அளிக்கவுள்ளனர். இதன் மூலம் சுமார் 2 ஆயிரத்திற்கும் மேற்பட்டோர் பயன்பெறுவார்கள்.
சிகிச்சை விவரம்
பில்ராத் - புற்றுநோய்
ஆர்பிஎஸ் - குடல் மற்றும் கல்லீரல்
முருகன் - நரம்பு மற்றும் எலும்பு
போர்டிஸ் மலர் - இருதய சிகிச்சைகள்
வாசன் - கண் பரிசோதனைகள் மற்றும் இலவச கண் கண்ணாடி வழங்குதல்
சென்னை பல் மருத்துவமனை - பல்
எம்இஆர்எப் - காது, மூக்கு, தொண்டை
ஹைகேர் - சர்க்கரை மற்றும் சிறுநீரகம்
சீடிஎச் - மனநலம், காசநோய்
ஆயுஸ் மருத்துவர்கள் - சித்த மருத்துவ சிகிச்சைகள்
மேற்கண்ட சிகிச்சை முறைகள் முகாம்களில் கலந்து கொள்ளும் மருத்துவமனைகள் மூலம் பொதுமக்களுக்கு அளிக்கப்படவுள்ளன.
நலத்திட்ட உதவி
பெருநகர சென்னை மாநகராட்சியில் உள்ள அனைத்து மண்டலங்களிலும், இந்த ஆண்டின் இறுதிக்குள் மண்டலத்திற்கு ஒரு முகாம் வீதம் நடத்தப்பட்டு, பொதுமக்களுக்கு தரமான மருத்துவ சிகிச்சை அளிக்கப்படும் எனவும் தெரிவிக்கப்பட்டுள்ளது. நிகழ்ச்சியில் கலந்து கொண்ட முதலமைச்சர் மு.க.ஸ்டாலின் பல்வேறு நலத்திட்ட உதவிகளை பயனாளிகளுக்கு வழங்கினார்.
நிகழ்ச்சியில் மருத்துவம் மற்றும் மக்கள் நல்வாழ்வுத்துறை அமைச்சர் மா. சுப்பிரமணியன், இந்து சமயம் மற்றும் அறநிலையத்துறை அமைச்சர் பி.கே. சேகர்பாபு, நாடாளுமன்ற உறுப்பினர் கலாநிதி வீராசாமி, சட்டப்பேரவை உறுப்பினர் தாயகம் கவி, சென்னை மாநகராட்சி ஆணையர் ககன்தீப் சிங் பேடி, அரசு உயர் அலுவலர்கள் உள்ளிட்டோர் கலந்து கொண்டனர்.
இதையும் படிங்க: அதிமுகவுக்கு நல்ல எதிர்காலம் உண்டு - சசிகலா!
