சென்னை, ரிப்பன் மாளிகையில் அங்கீகரிக்கப்பட்ட அரசியல் கட்சிகளுடனான சட்டப்பேரவை தேர்தல் குறித்த ஆலோசனைக் கூட்டம் மாவட்டத் தேர்தல் நடத்தும் அலுவலர் பிரகாஷ், மாநகரக் காவல் ஆணையர் மகேஷ்குமார் அகர்வால் தலைமையில் நடைபெற்றது. இதில் அதிமுக , திமுக உள்ளிட்ட அங்கீகரிக்கப்பட்ட கட்சிகளின் பிரதிநிதிகள் பங்கேற்றனர்.
ஆலோசனைக் கூட்டத்திற்குப் பிறகு செய்தியாளர்களை சந்தித்த பிரகாஷ், "பதற்றமான வாக்குச்சாவடிகளின் எண்ணிக்கை குறித்து காவல் ஆணையருடன் கலந்துரையாடல் நடந்தது. தேர்தல் ஆணையம், உச்ச நீதிமன்ற ஆணைப்படி பதற்றமான சாவடிகளைக் கையாள்வது குறித்து ஆலோசனை நடந்தது.
ஒரு தொகுதியில் 16 பேருக்கு மேல் வேட்பாளர்கள் இருந்தால் கூடுதல் வாக்குப்பதிவு எந்திரம் தேவைப்படும். சென்னைக்குக் கூடுதல் வாக்குப்பதிவு எந்திரங்கள் தேவைப்படுகின்றன. தற்போது 7,098 வாக்குப் பதிவு எந்திரங்கள், 7,454 விவிபாட் எந்திரங்கள் இருக்கின்றன. 537 விவிபாட் இயந்திரங்களின் செயல்திறன் சோதிக்கப்பட்டுள்ளன.
சென்னையில் மொத்தமுள்ள 7,300 தபால் வாக்குகளில், நேற்றுவரை 1,182 வாக்குகள் பதிவாகியுள்ளன. மாற்றுத்திறனாளிகள் வாக்குகளும் பெறப்பட்டுள்ளன. அடுத்த ஒரு வாரம் தீவிரமாக பரப்புரை நடக்கும். எனவே, புகார் பெறும் எண்களின் எண்ணிக்கையை அதிகரிக்க முடிவு செய்துள்ளோம். அதன்படி 1950, 18004257012 ஆகிய எண்ணில் தேர்தல் விதிமீறல் குறித்த புகார்களை பொதுமக்கள் தெரிவிக்கலாம்.
3,858 விண்ணப்பங்கள் தேர்தல் பரப்புரை தொடர்பாக வந்துள்ளன. அவற்றில் 648 நிராகரிக்கப்பட்டுள்ளது. 413 விண்ணப்பங்கள் பரிசீலனையில் உள்ளன.
கொளத்தூர் தொகுதியில் அதிக வேட்பாளர்கள் போட்டியிடுவதால் மூன்று மின்னணு வாக்குப்பதிவு எந்திரங்கள் தேவைப்படுகின்றன. தியாகராய நகர் தொகுதியில் மட்டும் ஒரே ஒரு எந்திரம் பயன்படுத்தப்படும்.
சென்னையில் மொத்தம் பிடிபட்டுள்ள 20 கோடியில், துறைமுகம் தொகுதியில் தான் அதிகபட்சமாக ஏழு கோடியே 77 லட்சம் வரை பிடிபட்டுள்ளது. ஐந்து கோடியே 31 லட்சம் அண்ணா நகரில் பிடிபட்டுள்ளது. மூன்றாம் இடத்தில் வேளச்சேரி தொகுதி உள்ளது. 99 விழுக்காடு பணம் பிடிபட்டுவிடுகிறது. பண விநியோகம் குறித்து தகவல் தரும் புகார்தாரர்களுக்குச் சன்மானம் தர முடியாது. புகார்தாரரின் விவரங்கள் ரகசியமாக பாதுகாக்கப்படும்.
ஒரு லட்சம் ரூபாய்க்கு மேலான வங்கிப் பரிவர்த்தனை குறித்து வருமான வரித்துறைக்கு தகவல் தரப்படுகிறது. 30 வங்கிகள் 10 லட்சத்துக்கும் மேல் பரிவர்த்தனையில் ஈடுபடும் தங்களது வாடிக்கையாளர்கள் குறித்து தினம்தோறும் தகவல் பரிமாறுகின்றனர்" எனத் தெரிவித்தார்.
இதையும் படிங்க: 'ஜெயலலிதா இருந்திருந்தால் பாஜகவை தமிழ்நாட்டிற்குள் நுழையவிட்டிருக்கமாட்டார்’- ஜோதிமணி
