சென்னை பல்லாவரம் அடுத்த சங்கர்நகர் பகுதியை சேர்ந்தவர் சரவணன்(42). இவர் அதே பகுதியில் ஆட்டோ ஓட்டுனராக உள்ளார்.
இந்நிலையில் சங்கர் நகர் காவல் நிலையம் அருகே உள்ள சாலையில் ஆட்டோவை நிறுத்தி விட்டு செல்போனில் பேசிக்கொண்டு இருந்தபோது இருசக்கர வாகனத்தில் வந்த அடையாளம் தெரியாத நபர் ஒருவர் சரவணனின் செல்போனை பறித்துக்கொண்டு சென்றுள்ளார்.
இதையடுத்து சரவணன் சங்கர் நகர் காவல் நிலையத்திற்குச் சென்று புகார் அளித்துள்ளார். இதேபோல், அப்பகுதியில் நடந்து சென்று கொண்டிருந்த ஒரு பெண்ணிடம் இரண்டு அடையாளம் தெரியாத நபர்கள் செல்போன் பறித்துக்கொண்டு தப்பிச் சென்றனர்.
இதையடுத்து சங்கர் நகர் போலீசார் இரண்டு சம்பவங்களின் சிசிடிவி காட்சிகளை வைத்து விசாரணை மேற்கொண்டதில் அந்த அடையாளம் தெரியாத நபர்களில் ஒருவர் நாகல்கேணி பகுதியைச் சேர்ந்த மணிகண்டன்(22) எனத் தெரியவந்தது.
இதையடுத்து சங்கர் நகர் போலீசார் அவரை கைது செய்து விசாரணை மேற்கொண்டதில் மணிகண்டனுக்கு உதவிய அவரின் நண்பர்களான நாகல்கேணி பகுதியைச் சேர்ந்த வினோத்(19), ஸ்டீபன்(22) ஆகிய இருவரையும் கைது செய்தனர்.
பின்னர் இவர்களிடம் நடத்திய விசாரணையில் இவர்கள் புறநகர் பகுதிகளில் பல இடங்களில் தனியாக நடந்து செல்லும் நபர்களிடம் இருந்து செல்போன்களை திருடிச் சென்று அதனை ஓஎல்எக்ஸ் (OLX) மூலம் விற்பனை செய்தது தெரியவந்தது.
மேலும் இவர்களிடம் இருந்து ஐந்து செல்போன்கள், ஒரு இருசக்கர வாகனத்தை பறிமுதல் செய்தனர். இதையடுத்து இவர்கள் மீது வழக்குப்பதிவு செய்து மூன்று பேரையும் நீதிமன்றத்தில் ஆஜர்படுத்தி புழல் சிறையில் அடைத்தனர்.
மேலும் முக்கிய குற்றவாயான முருகன் என்பவரை தேடிவந்த நிலையில் அவர் படப்பை அருகே தனியார் அடுக்குமாடி குடியிருப்பில் பதுங்கி இருப்பது தெரிய வந்தது.
இதையடுத்து சங்கர் நகர் போலீசார் முருகனை கைது செய்து அவர் மீது வழக்குப்பதிவு செய்து நீதிபதி முன் ஆஜர்படுத்தி சிறையில் அடைத்தனர்.
இதையும் படிங்க: சினிமா பட பாணியில் நடந்த சேஷிங்: மணல் திருடிய ஜேசிபி ஓட்டுநர் கைது
