சென்னை: ஈரோடு அதிரடிப்படை ஐஜியாக பணியாற்றி வருபவர் ஐ.பி.எஸ் அதிகாரி முருகன்(59). இவர் சென்னையில் லஞ்ச ஒழிப்புத்துறை அதிகாரியாக பணியாற்றிய போது பெண் ஐ.பி.எஸ் அதிகாரிக்கு பாலியல் தொல்லை அளித்தாகக் குற்றச்சாட்டுகள் எழுந்தன. குறிப்பாகக் கடந்த 2017ஆம் ஆண்டு முதல் 2018ஆம் ஆண்டு ஆகஸ்டு வரை பல முறை ஐஜி முருகன் பெண் அதிகாரிக்கு செல்போனில் பாலியல் ரீதியாக ஆபாச தகவல் அனுப்பியதாகவும், தனியாக அறைக்கு அழைத்துச் சென்று அத்துமீறியதாகவும், ஆதாரத்துடன் குற்றஞ்சாட்டி இருந்தார்.
இந்த புகார் தொடர்பாக விசாகா கமிட்டி அமைக்கப்பட்டு விசாரணை நடத்தினர். ஆனால் பாதிக்கப்பட்ட பெண் ஐ.பி.எஸ் அதிகாரி சிபிசிஐடி விசாரணை நடத்தினால் மட்டுமே நியாயம் கிடைக்கும் எனச் சென்னை உயர்நீதிமன்றத்தில் வழக்கு தொடர்ந்தார். பின்னர் இந்த வழக்கானது 2019 ஆம் ஆண்டு தெலங்கானா மாநிலத்துக்கு மாற்றப்பட்டு விசாரணை நடத்தப்பட்டு வந்தது.அதுமட்டுமல்லாது சிபிசிஐடி போலீசார் ஐஜி முருகன் மீது வழக்கு பதிவு செய்து விசாரணை நடத்தி வருகின்றனர்.
மேலும் கடந்த 2021 ஆம் ஆண்டு பாதிக்கப்பட்ட பெண் எஸ்.பி தொடர்ந்த பாலியல் வழக்கைத் தமிழகத்திலே விசாரணை நடத்த உச்சநீதிமன்றம் அனுமதி வழங்கியது.
இந்த நிலையில் குற்றம் சாட்டப்பட்ட ஐஜி முருகன் ஐபிஎஸ் அதிகாரி என்பதால் அவர் மீது நீதிமன்ற நடவடிக்கை எடுக்கவும், குற்றப்பத்திரிக்கை தாக்கல் செய்யவும் அனுமதி வழங்க ஆளுநர் மற்றும் தமிழக அரசுக்கு சிபிசிஐடி காவல்துறை அனுமதி கடிதம் எழுதியிருந்தனர்.
இதனையடுத்துஐஜி முருகன் மீது அடுத்த கட்ட நடவடிக்கை எடுக்க சிபிசிஐடி காவல்துறைக்குத் தமிழக அரசும், ஆளுநரும் அனுமதி வழங்கினர். அதன் அடிப்படையில் ஐ ஜி முருகன் மீது எழும்பூர் நீதிமன்றத்தில் குற்றப் பத்திரிக்கை தாக்கல் செய்தனர்.
குறிப்பாக ஐஜி மீது பாலியல் வன்கொடுமை தடுப்புச் சட்டம் உட்பட ஆறு பிரிவுகளின் கீழ் வழக்கு பதிவு செய்துள்ளதாகக் குற்றப்பத்திரிக்கையில் தெரிவித்துள்ளது. மேலும் 20 சாட்சியங்கள் விசாரிக்கப்பட்டு அவர்களது வாக்குமூலங்களைப் பதிவு செய்த ஆவணங்கள் உட்பட 112 பக்க குற்றப்பத்திரிக்கையை நீதிமன்றத்தில் சிபிசிஐடி காவல்துறை சமர்ப்பித்து உள்ளனர்.
இதையும் படிங்க: Rahul Gandhi flying kiss: 50 வயது பெண்ணுக்கு ராகுல் காந்தி ஏன் பறக்கும் முத்தம் கொடுக்க வேண்டும்: ஸ்மிருதி இரானிக்கு பெண் எம்.எல்.ஏ.பதிலடி!
