சென்னை: நேரடியாக சாதிப் பெயர் குறிப்பிடப்பட்டிருந்த 11ஆம் வகுப்பு சேர்க்கைப் படிவத்தை நிறுத்தி வைக்குமாறு, சென்னை மாநகராட்சி உத்தரவிட்டுள்ளது.
கரோனா தொற்றின் இரண்டாவது அலை குறைந்து வருவதையொட்டி, சென்னையிலுள்ள பள்ளிகளில் பிளஸ் 1 வகுப்பு சேர்வதற்கான படிவத்தை விநியோகம் செய்யலாம் என, தமிழ்நாடு அரசு அறிவித்தது.
இதையடுத்து சென்னையிலுள்ள 32 மாநகராட்சி மேல்நிலைப் பள்ளிகளிலும், பிளஸ் 1 வகுப்பு சேர்க்கைக்கான படிவத்தை இன்று (ஜூன்.14) காலை முதல் மாநகராட்சி பள்ளி ஆசிரியர்கள் வழங்கிவந்தனர்.
இந்தநிலையில், அந்தப் படிவத்தில் சாதி அடிப்படையான கேள்வியில் தாழ்த்தப்பட்டோர், மலை சாதியினர், பிற்படுத்தப்பட்டோர், மிகவும் பிற்படுத்தப்பட்டோர் என குறிப்பிட்டிருந்தது.
ஒரு அரசு வெளியிடும் படிவத்தில், எவ்வாறு ஒரு சாதியை வெளிப்படையாக குறிப்பிடுவது என்பது குறித்து, சமூக வலைதளங்களில் கேள்வி எழுப்பப்பட்டது.
இது அதிகளவில் பகிரப்பட்டதால் பேசும் பொருளாக மாறியது. அதனால் சாதிப்பெயரை குறிப்பிட்ட படிவத்தை சென்னை மாநகராட்சி உடனடியாக மாற்ற வேண்டுமென, பல்வேறு சமூக ஆர்வலர்கள் வலைதளத்தில் கருத்து தெரிவித்தனர்.
இதையடுத்து சென்னை மாநகராட்சி நிர்வாகம், இந்தப் படிவத்தை தற்காலிகமாக நிறுத்தி வைக்குமாறு அலுவலர்களுக்கு உத்தரவிட்டுள்ளது.
இதுகுறித்து நமது ஈடிவி பாரத்திடம் தொலைபேசியில் பேசிய மாநகராட்சி அலுவலர் ஒருவர், "பழைய படிவத்தை தற்போது விநியோகம் செய்துள்ளனர்.
மாநகராட்சி கவனத்துக்கு, இந்தத் தகவல் வந்தவுடன் படிவத்தை தற்காலிகமாக நிறுத்துமாறு சென்னையில் உள்ள 32 பள்ளிகளுக்கும் உத்தரவிட்டுள்ளோம்.
விரைவில் புதிய படிவத்தை அனைத்து பள்ளிகளுக்கும் விநியோகிக்க உள்ளோம்" என்றார்.
இதையும் படிங்க: ’கிக்’ ஏற்றி கிறங்கடிக்கும் கியாரா அத்வானி போட்டோஷூட்
