ஆவடியை அடுத்த சேக்காடு பகுதியைச்சேர்ந்தவர் மகேஷ் (27). இவர் தனதுதாய் பச்சையம்மாளுடன் வசித்து வருகிறார். குடிபழக்கத்திற்கு அடிமையான மகேஷை, தாய் பச்சையம்மாள் மூன்று மாதத்திற்கு முன்பு மறுவாழ்வு மையத்தில் சேர்த்துள்ளார். மறுவாழ்வு மையத்தில் சிகிச்சை முடிந்து மகேஷ் குணமடைந்ததையடுத்து, பச்சையம்மாள் வீட்டுக்கு அழைத்து வந்துள்ளார்.
இதனையடுத்து, மார்ச் 25ஆம் தேதி மகேஷ் வீட்டிலிருந்து மாயமாகியுள்ளார். பல்வேறு இடங்களில் தேடி எந்த தகவலும் கிடைக்காததையடுத்து, பச்சையம்மாள் போலீஸில் புகாரளித்துள்ளார். புகாரின் அடிப்படையில் வழக்கு பதிவு செய்து போலீஸார் விசாரணை மேற்கொண்டுள்ளனர். இந்நிலையில், ஆவடி வி.ஜி.என் நகர் பகுதியிலுள்ள மரத்தின் கீழ் மகேஷ் இறந்த நிலையில் கிடந்ததாக போலீஸாருக்கு தகவல் வந்துள்ளது.
பின்னர் சம்பவ இடத்திற்கு விரைந்து சென்ற போலீஸார், மரத்தின் கீழ் அழுகிய நிலையில் கிடந்த மகேஷ்-ன் உடலைக் கைப்பற்றி பிரேத பரிசோதனைக்காக கீழ்ப்பாக்கம் அரசு மருத்துவமனைக்கு அனுப்பி வைத்தனர். மகேஷ் இறப்பு குறித்த காரணம் பிரேத பரிசோதனைக்கு பின்னர்தான் தெரியவரும் என போலீஸார் சார்பாகத் தெரிவிக்கப்பட்டுள்ளது. இந்த சம்பவம் அப்பகுதி மக்களிடையே பரபரப்பை ஏற்படுத்தியுள்ளது.
