சென்னை ஏழு கிணறு பகுதியைச் சேர்ந்தவர் பிரபாகரன்( 45). இவர் அண்ணா சாலை ராயலா டவரில் எட்டாவது மாடியில் உள்ள கேம்ஸ் நிறுவனத்தில் உதவி மேலாளராக பணிபுரிந்துவந்தார். இந்நிலையில், இன்று (செப்டம்பர் 8) வழக்கம் போல் அலுவலகத்திற்கு வந்த பிரபாகரன் மன உளைச்சலில் இருந்ததாக கூறப்படுகிறது.
பின்னர் காற்று வாங்க போவதாக கூறி ஜன்னல் ஓரத்தில் அமர்ந்த பிரபாகரன் திடீரென்று கீழே குதித்து தற்கொலை முயற்சியில் ஈடுபட்டார். ரத்த வெள்ளத்தில் உயிருக்கு போராடியிருந்த பிரபாகரனை அருகிலிருந்த நபர்கள் மீட்டு ராயப்பேட்டை அரசு மருத்துவமனைக்கு அனுப்பி வைத்தனர்.
அங்கு பிரபாகரனை பரிசோதித்த மருத்துவர்கள் அவர் இறந்து விட்டதாக தெரிவித்தனர். இந்த சம்பவம் தொடர்பாக சிந்தாதிரிப்பேட்டை காவல்துறையினர் வழக்குப் பதிவு செய்து விசாரித்து வருகின்றனர்.
பிரபாகரனுடன் ஒன்றாக பணிபுரிந்து வரும் நபர்களிடம் விசாரித்தபோது, பிரபாகரன் உடல்நிலை சரியில்லாமல் மன உளைச்சலில் இருந்து வந்ததாக தெரிவித்தனர். இதனால் தனக்கு கரோனா நோய் இருக்குமோ என்ற அச்சத்தினால் தற்கொலை செய்து கொண்டரா அல்லது வேறு காரணமா என்ற கோணத்தில் காவல்துறையினர் விசாரணை நடத்தி வருகின்றனர்.
