சென்னை: வருத்தப்படாத வாலிபர் சங்கம், தமிழுக்கு எண் ஒன்றை அழுத்தவும் உள்ளிட்ட பல திரைப்படங்களில் துணை நடிகையாக நடித்து பிரபலம் அடைந்தவர், ஷாலு ஷம்மு. இன்ஸ்டாகிராமில் கவர்ச்சி புகைப்படங்களை பதிவிட்டு வருவதன் மூலம் அதிக ஃபாலோவர்ஸ்கள் இவரை பின் தொடர்ந்து வருகின்றனர்.
இந்த நிலையில் ஷாலு ஷம்மு கடந்த 9ஆம் தேதி ஈஸ்டர் நாளில், சென்னை - எம்.ஆர்.சி நகரில் உள்ள நட்சத்திர விடுதியில் பார்ட்டி கொண்டாடிவிட்டு, பின்னர் சூளைமேட்டில் தனது நண்பர்களுடன் தங்கியபோது, அவரது புதிய 2 லட்சம் மதிப்புடைய ஐபோன் காணாமல் போனது. இந்த திருட்டுச் சம்பவம் தொடர்பாக நடிகை ஷாலு ஷம்மு பட்டினம்பாக்கம் காவல் நிலையத்தில் தனது நண்பர்கள் மீது சந்தேகம் இருப்பதாக புகார் அளித்திருந்தார்.
பின்னர் இந்தச் சம்பவம் தொடர்பாக ஷாலுவின் நண்பரை அழைத்து போலீசார் விசாரணை நடத்தினர். மேலும் ஐகிளவுடு மூலமாக செல்போன் காணாமல் போன இடத்தை கண்டுபிடித்து போலீசாருக்குத் தகவல் தெரிவித்தார், ஷாலு ஷம்மு. இந்த நிலையில் நேற்று ஷாலு ஷம்முவிற்கு டன்சோ நிறுவனத்திலிருந்து ஒரு பார்சல் வந்துள்ளது.
தான் ஆர்டர் செய்யாமல் வந்த பார்சலால் அதிர்ச்சியடைந்த ஷாலு ஷம்மு, பின்னர் அந்த பார்சலை பிரித்து பார்த்த போது, பேரிச்சம்பழம் பாக்ஸில் காணாமல் போன அவருடைய ஐபோனை கண்டு மகிழ்ச்சியடைந்துள்ளார். தற்போது காணாமல் போன ரூ.2 லட்சம் மதிப்புள்ள ஐபோன் மறுபடியும் கிடைத்த நிலையில், ஷாலு ஷம்மு இது தொடர்பாக தனது இன்ஸ்டாகிராம் பக்கத்தில் பதிவு ஒன்றை எழுதி ஷேர் செய்துள்ளார்.
- " class="align-text-top noRightClick twitterSection" data="
">
அந்தப் பதிவில், "தான் திருடியதாக சந்தேகித்த நண்பர் தனது ஐபோனை திருடியதாகவும், 8 வருட கால நட்பு வீண். யாரை நம்புவது எனத் தெரியவில்லை" என நடிகை ஷாலு ஷம்மு பதிவிட்டுள்ளார். நடிகை ஷாலு ஷம்மு திருடு போன ஐபோனுக்காக போலீசிடம் சென்றதால், திருடிய நபர் எங்கு தான் மட்டிக் கொள்வோமோ என்ற பயத்தில் பார்சல் மூலம் போனை அனுப்பியதாகத் தெரிகிறது.
இதையும் படிங்க: சிவகார்த்திகேயனின் மாவீரன் ரிலீஸ் தேதி அறிவிப்பு!
