துணைவேந்தர்கள் நியமன விவகாரம்: தமிழ்நாடு ஆளுநருக்கு உயர்கல்வித் துறை அமைச்சர் பதிலடி!

பல்கலைக்கழகங்களில் துணைவேந்தர்களை நியமனம் செய்ய அமைக்கப்பட்டுள்ள தேடுதல் குழு சட்டப்படியான முடிவாகும் என்று தமிழ்நாடு ஆளுநர் ஆர்.என்.ரவிக்கு, உயர்கல்வித் துறை அமைச்சர் கோவி.செழியன் பதிலடி கொடுத்துள்ளார்.

சென்னை: மாநில அரசு பல்கலைக்கழகங்களில் காலியாக உள்ள துணைவேந்தர் பணியிடங்களை நிரப்ப தகுதியுள்ள நபரை தேர்ந்தெடுக்க தேடுதல் குழுக்கள் அமைக்கப்பட்டிருப்பது மாநில அரசு பல்கலைக்கழக சட்ட பிரிவுகளுக்கு உட்பட்டு எடுக்கப்பட்ட முடிவாகும் என உயர்கல்வித் துறை அமைச்சர் கோவி செழியன் தெரிவித்துள்ளார்.

இதுதொடர்பாக அமைச்சர் கோவி.செழியன் இன்று விரிவான அறிக்கை ஒன்றை வெளியிட்டுள்ளார். அதில், 'மாநில அரசு பல்கலைக்கழகங்களின் சட்டப் பிரிவுகளின்படி அமைக்கப்பட்ட தேடுதல் குழுவினால் பரிந்துரைக்கப்படும் மூன்று நபர்களில் ஒருவர் சார்ந்த பல்கலைக்கழகங்களின் துணைவேந்தராக, ஆளுநரால் (வேந்தர்) நியமனம் செய்யப்படுவார். இதுவரை இந்த நடைமுறையையே பின்பற்றப்பட்டு வருகிறது.

அதன்படியே, தமிழ்நாடு அரசால் பாரதியார் மற்றும் தமிழ்நாடு ஆசிரியர் கல்வியியல் பல்கலைக்கழகங்களுக்கு புதிய துணைவேந்தர்களை தேர்வு செய்வதற்கு, ஆளுநர் அலுவலக கடிதத்தில், சார்ந்த பல்கலைக்கழகங்களின் சட்டவிதிகளின் படி மூன்று பேர் அடங்கிய தேடுதல் குழு அமைத்து அரசிதழில் வெளியிட தெரிவிக்கப்பட்டது. அதனடிப்படையில் அரசால் மூன்று பேர் அடங்கிய தேடுதல் குழு அரசிதழில் அறிவிக்கையாக வெளியிடப்பட்டது.

ஆனால், ஆளுநர் தன்னிச்சையாக, பல்கலைக்கழக மானியக் குழுவின் 2018 ஆம் ஆண்டைய நெறிமுறைகளின்படி, இந்த பல்கலைக்கழகங்களின் தேடுதல் குழுக்களில் நான்காவது நபராக பல்கலைக்கழக மானியக் குழுவின் தலைவரால் பரிந்துரைக்கப்பட்ட உறுப்பினர் ஒருவரை நியமனம் செய்து பாரதியார், தமிழ்நாடு ஆசிரியர் கல்வியியல் மற்றும் சென்னை பல்கலைக்கழகங்களுக்கு நான்கு பேர் அடங்கிய தேடுதல் குழு அமைத்து 6.9.2023 ந் தேதி அறிவிக்கைகளை வெளியிட்டார். ஆனால், தமிழ்நாடு அரசு சென்னை பல்கலைக்கழக துணைவேந்தரைத் தேர்வு செய்வதற்கு அந்தப் பல்கலைக்கழக சட்டவிதிகளின்படி மூன்று பேர் மட்டுமே அடங்கிய தேடுதல் குழு அமைத்து அரசாணை வெளியிட்டு அறிவிப்பு அரசிதழில் வெளியிடப்பட்டது.

ஆனால், ஆளுநர் இந்த தேடுதல் குழுவினை ஏற்காமல், பல்கலைக்கழக மானியக் குழுவின் 2018 ஆம் ஆண்டைய நெறிமுறைகளின்படி, பல்கலைக்கழகங்களின் தேடுதல் குழுக்களில் நான்காவது நபராக பல்கலைக்கழக மானியக் குழுவின் தலைவரால் பரிந்துரைக்கப்பட்ட உறுப்பினர் ஒருவரை நியமனம் செய்ய முதலமைச்சருக்கு கடிதம் மூலமாக வலியுறுத்தினார்.

பல்கலைக்கழக துணைவேந்தரை தேர்வு செய்வதற்காக அமைக்கப்படும் தேடுதல் குழுவை அறிவிக்கையாக வெளியிடுமாறு ஆளுநர் அரசிற்கு பரிந்துரை மட்டுமே செய்ய முடியுமே தவிர, ஆளுநர் தன்னிச்சையாக தேடுதல் குழுவினை அமைத்து அறிவிப்பு வெளியிடுவதற்கு அவருக்கு அதிகாரம் இல்லை.

அதனால் ஆளுநரின் கடிதம் குறித்து அரசு தீவிரமாக ஆய்வு செய்து, மேற்குறிப்பிட்ட பல்கலைக்கழகங்களுக்கு அமைக்கப்பட்ட தேடுதல் குழுக்கள் அரசாணையின்படியும், அந்தந்த பல்கலைக்கழக சட்டப்படியும் தான் உள்ளதால், நான்காவது நபராக பல்கலைக்கழக மானியக் குழுத் தலைவரால் பரிந்துரைக்கப்பட்ட உறுப்பினரைச் சேர்த்து இந்த பல்கலைக்கழகங்களுக்கு அமைக்கப்பட்ட தேடுதல் குழுவை மாற்றியமைக்க வேண்டிய அவசியம் எழவில்லை என தமிழ்நாடு முதலமைச்சர் ஆளுநருக்கு 13.9.2023 ந் தேதி கடிதம் மூலம் தெரிவிக்கப்பட்டது.

மேலும் இதுதவிர, ஆளுநரின் துணை வேந்தர் தேடுதல் குழு அறிவிக்கைகளை எதிர்த்து, அரசு உச்சநீதிமன்றத்தில் வழக்கு தொடர்ந்தது. (W.P. (C) 1271 of 2023). இவ்வழக்கு தற்போது நிலுவையில் உள்ளது.

ஆளுநர் அலுவலகத்தின் மூலம் 9.1.2024 அன்று வெளியிடப்பட்ட பத்திரிக்கை செய்தி மூலம் பாரதியார், தமிழ்நாடு ஆசிரியர் கல்வியியல் மற்றும் சென்னை பல்கலைக்கழகங்களுக்கு புதிய துணைவேந்தர் தேர்வு செய்வதற்காக பல்கலைக்கழக மானியக் குழு தலைவரால் பரிந்துரைக்கப்பட்ட உறுப்பினர் ஒருவர் அடங்கிய நான்கு பேர் கொண்ட தேடுதல் குழுவினை அமைத்து வெளியிட்ட தனது 6.9.2023 ஆம் நாளிட்ட அறிவிக்கைகளை திரும்பப் பெற்றுக்கொண்டார்.

தமிழ்நாடு அரசு உயர் கல்வித்துறையின் கட்டுப்பாட்டின் கீழ் 13 பல்கலைக்கழகங்கள் இயங்கி வருகின்றன. இவற்றுள் ஆறு பல்கலைக்கழகங்களில் துணைவேந்தர் பணியிடம் காலியாக உள்ளது.

• பாரதியார் பல்கலைக்கழகம், கோயம்புத்தூர்

• தமிழ்நாடு ஆசிரியர் கல்வியியல் பல்கலைக்கழகம், சென்னை

• சென்னை பல்கலைக்கழகம், சென்னை

• அண்ணா பல்கலைக்கழகம், சென்னை

• அண்ணாமலை பல்கலைக்கழகம், சிதம்பரம்.

• மதுரைக் காமராசர் பல்கலைக்கழகம், மதுரை.

மேலும் திருச்சி, பாரதிதாசன் மற்றும் சேலம், பெரியார் பல்கலைக்கழகங்களின் தற்போதைய துணைவேந்தர்களின் பதவிக்காலம் முடிவுற்ற நிலையில் அவர்களது பணிக்காலம் ஆளுநரால் மேலும் ஓராண்டிற்கு நீட்டிக்கப்பட்டு அவை முறையே பிப்ரவரி 2025 மற்றும் மே 2025ல் முடிவுறவுள்ளது.

தமிழ்நாட்டில் உள்ள பல்கலைக்கழகங்களின் சட்ட விதிகளின்படி துணைவேந்தர் தேர்வு செய்வதற்கு அமைக்கப்படும் தேடுதல் குழுவில் ஆளுநரால் பரிந்துரைக்கப்படும் உறுப்பினர், அரசால் பரிந்துரைக்கப்படும் உறுப்பினர் மற்றும் சார்ந்த பல்கலைக்கழக ஆட்சிக்குழு அல்லது ஆட்சிப்பேரவையினால் பரிந்துரைக்கப்படும் உறுப்பினர் ஆகிய மூன்று நபர்களைக் கொண்ட தேடுதல் குழு அமைக்கப்படும்.

உச்சநீதிமன்றத்தால், ஜெகதீஷ் பிரசாத் சர்மா மற்றும் பலர் பீகார் மாநில அரசிற்கு எதிராக தொடர்ந்த வழக்கில், கல்வி என்பது அரசியல் சாசனத்தின் பொதுப்பட்டியலில் (பிரிவு-3) வருவதால், மாநில அரசானது கல்வியில் தனது சட்டங்களை சொந்தமாக வகுக்க சுதந்திரமும் அதிகாரமும் கொண்டுள்ளதால், பல்கலைக்கழக மானியக் குழுவின் நெறிமுறைகளை முழுமையாக பின்பற்ற வேண்டிய கட்டாயமில்லை எனவும், பல்கலைக்கழக மானியக் குழுவின் சட்டம் 1956ன் பிரிவு 26ல் குறிப்பிட்டுள்ளபடி, எந்தெந்த நெறிமுறைகளை ஏற்க விரும்புகிறதோ அவற்றை மட்டுமே பின்பற்றலாம் என தீர்ப்பு வழங்கியுள்ளது.

எனவே, உயர்கல்வித்துறை, நாள் 11.1.2021 மூலம், பல்கலைக்கழக நிதிநல்கைக் குழுவின் நெறிமுறைகள் 2018-இல் குறிப்பிடப்பட்டுள்ள நெறிமுறை 7.3 (ii)னை ஏற்காத காரணத்தாலும், உச்சநீதிமன்றத்தால், ஜெகதீஷ் பிரசாத் சர்மா மற்றும் சிலர் பீகார் மாநில அரசிற்கு எதிராக தொடர்ந்த வழக்கில் வெளியிடப்பட்ட தீர்ப்பின் அடிப்படையிலும், மாநில பல்லைக்கழகங்களுக்கு சார்ந்த சட்டவிதிகளின்படி தேடுதல் குழுவினை அமைக்க தமிழ்நாடு அரசுக்கு உரிய சட்ட அதிகாரம் , உரிமை உள்ளதாக தெரிவிக்கப்பட்டுள்ளது.

தற்போது, அண்ணாமலை பல்கலைக்கழகத்திற்கு அடுத்த துணைவேந்தர் நியமனம் செய்வதற்கு மூன்று பேர் அடங்கிய தேடுதல் குழு (Search Committee) அமைத்து ஆணைகள் வெளியிடப்பட்டு அறிவிக்கை அரசிதழில் வெளியிடப்பட்டது.

மேலும், திருச்சி, பாரதிதாசன் மற்றும் சேலம், பெரியார் பல்கலைக்கழக துணைவேந்தர்களின் பதவிக்காலம் முறையே வரும் பிப்ரவரி 2025 மற்றும் மே 2025ல் முடிவடைய உள்ளதால், இந்த பல்கலைக்கழகங்களுக்கும் புதிய துணைவேந்தர் நியமனம் செய்வது தொடர்பாக, சார்ந்த பல்கலைக்கழகங்களின் சட்டவிதிகளின்படியும், உரிய சட்ட வல்லுநரின் ஆலோசனையை பெற்றும் மூன்று பேர் அடங்கிய தேடுதல் குழு அமைத்து ஆணைகள் வெளியிடப்பட்டுள்ளன. இதில் எவ்வித விதி மீறல்களும் இல்லை.

தற்போது ஆளுநர்-வேந்தரின் அலுவலகத்தால் 18.12.2024 அன்று வெளியிடப்பட்ட பத்திரிகைச் செய்தியில், அண்ணாமலை பல்கலைக்கழகத்திற்கு புதிய துணைவேந்தர் நியமனம் செய்வது தொடர்பாக அமைக்கப்பட்ட மூன்று பேர் அடங்கிய தேடுதல் குழு (Search Committee) பல்கலைக்கழக மானியக் குழுவின் 2018 ஆம் ஆண்டைய நெறிமுறைகள் மற்றும் உச்சநீதிமன்ற தீர்ப்பினையும் மீறுவதாக உள்ளது என தெரிவித்து, மேற்படி அரசாணையை திரும்ப பெறவும், தேடுதல் குழுவில் நான்காவது நபராக பல்கலைக்கழக நிதிநல்கைக் குழுவின் தலைவரால் பரிந்துரைக்கப்பட்ட உறுப்பினரை சேர்க்கும்படியும் வலியுறுத்தப்பட்டுள்ளது.

பல்கலைக்கழகங்கள் மற்றும் கல்லூரிகளில் ஆசிரியர் மற்றும் இதர கல்வி பணியாளர்களை நியமனம் செய்வதற்கு குறைந்தபட்ச தகுதிகள் மற்றும் உயர்கல்வியில் தரத்தினை பராமரிப்பதற்கான நடவடிக்கைகள் குறித்து நெறிமுறைகளை பல்கலைக்கழக மானியக் குழு நெறிமுறைகள், 2018 (UGC Regulations 2018) மூலம் வெளியிட்டது.

பல்கலைக்கழக மானியக் குழுவால் வெளியிடப்படும் நெறிமுறைகளானது பல்கலைக்கழக மானியக் குழுவால் மாநில அரசிற்கு பரிந்துரைப்பது வழிகாட்டுதல்களே (Only recommendations) தவிர, அவற்றை ஏற்பது என்பது மாநில அரசின் முடிவிற்கு உட்பட்டதாகும். எனவே அந்த நெறிமுறைகளை ஏற்பதற்காக, அந்த நெறிமுறைகளில் பல்கலைக்கழக துணைவேந்தரை தேர்வு செய்வதற்காக அமைக்கப்படும் தேடுதல் குழுவினை குறித்து குறிப்பிடப்பட்டுள்ள நெறிமுறை 7.3 (ii) –இல் சார்ந்த பல்கலைக்கழகங்களின் சட்டவிதிகளின்படியே தேர்வுக்குழு அமைக்கப்படும் என உயர்கல்வித்துறை மூலம் ஆணைகள் வெளியிடப்பட்டுள்ளன.

இந்த நிலையில், அண்ணாமலை, அண்ணா, பாரதிதாசன் மற்றும் பெரியார் பல்கலைக்கழகங்களுக்கு அமைக்கப்பட்ட தேடுதல் குழுக்கள் சார்ந்த பல்கலைக்கழக சட்டங்களின் படியும் தமிழ்நாடு அரசால் வெளியிடப்பட்ட அரசாணை அடிப்படையிலும் தான் உள்ளது, இதில் விதிமீறல்கள் ஏதும் இல்லை. எனவே, பல்கலைக்கழக மானியக் குழு தலைவரால் பரிந்துரைக்கப்பட்ட உறுப்பினரைச் சேர்த்து, பல்கலைக்கழகங்களுக்கு அமைக்கப்பட்ட தேடுதல் குழுவை மாற்றியமைக்க வேண்டிய அவசியம் எழவில்லை.

மக்களால் தேர்ந்தெடுக்கப்பட்ட அரசை செயல்பட விடாமல் பல்வேறு இடையூறுகளை பலவகையிலும் ஆளுநர் செய்து வருகிறார். அதன் ஒரு பகுதிதான் துணை வேந்தர் தேடுதல் குழு அமைப்பு விவகாரத்தில் ஆளுநர் அனுப்பி உள்ள கடிதம்.

பல்வேறு மாநிலங்களைக் கொண்ட இந்தியாவில் அந்தந்த மாநில மக்களின் பண்பாட்டு கூறான கல்வி உள்ளிட்ட அடிப்படைத் தேவைகளை மாநில மக்களின் தேவைகளை உணர்ந்து அந்தந்த மாநில தேவைகளுக்கு தகுந்தார்போல் உயர்கல்வி அமைப்பினை அமைத்துக் கொள்ள மக்களால் தேர்ந்தெடுக்கப்பட்ட மாநில அரசுக்கு அதிகாரமும் உரிமையும் உள்ளது.

ஒவ்வொரு பல்கலைக்கழகமும் அதற்கென்று உருவாக்கப்பட்ட சட்டத்தின் படியே செயல்படுகிறது. பல்கலைக்கழகம் பொதுவான சில பரிந்துரைகளை அவ்வப்போது வழங்கும். தேர்ந்தெடுக்கப்பட்ட மாநில அரசு தனது பல்கலைக்கழகத்திற்கு தான் இயற்றிய சட்டத்திற்கு உட்பட்டு செயல்படும். பல்கலைக்கழக மானியக் குழு, பல்கலைக்கழகம் அல்லது அரசிற்கு ஏதேனும் தெரிவிக்க வேண்டியது இருந்தால் அதை நேரடியாக தெரிவிக்கும்.

வேந்தர் என்ற பதவி வழி பொறுப்பை பயன்படுத்தி அரசு பல்கலைக்கழக சட்டப்படி எடுக்கப்படும் நடவடிக்கைகளை முடக்குவது எந்த வகையிலும் ஏற்புடையது அல்ல. ஆளுநர் அவர்கள் சட்டத்தை தவறாக தன் கையில் எடுத்துச் செயல்முறைகள் வெளியிடும் போக்கை அரசு கவனித்துக் கொண்டுதான் இருக்கிறது. மக்களால் தேர்ந்தெடுக்கப்பட்ட அரசை செயல்பட விடாமல் பல்வேறு இடையூறுகளை பலவகையிலும் ஆளுநர் செய்து வருகிறார்.

அதன் ஒரு பகுதிதான் துணை வேந்தர் தேடுதல் குழு அமைப்பு விவகாரத்தில் ஆளுநர் அனுப்பி உள்ள கடிதம். பல்கலைக்கழகங்கள் பல மாதங்களாக துணை வேந்தர் இல்லாமல் செயல்படுவதைப் பற்றி சிறிதும் கவலைப்படாமல் ஆளுநர் நடந்து கொள்ளவது மாணவர்கள் நலனுக்கு எதிரானது ஆகும்.

மாணவர்கள் நலன் கருதி மாநில ஆளுநர் பல்கலைக்கழகச் சட்டத்திற்கு உட்பட்டு அமைக்கப்பட்ட தேடுதல் குழுவிற்கு ஒப்புதல் அளித்திடுவதே அவர் வகிக்கும் பதவிக்கு அழகாகும். மக்களால் தேர்ந்தெடுக்கப்பட்ட அரசு சட்டமன்றம் மூலம் நிறைவேற்றப்படும் சட்டங்களுக்கு ஒப்புதல் வழங்குவது ஆளுநரின் கடமை.

ஆனால் அதனை செய்யாமல் அரசால் நிறைவேற்றப்படும் மக்கள் நலன் காக்கும் பலவற்றை நிராகரித்து வருகிறார். இதிலும் பல்கலைக்கழக நிதிநல்கைக் குழுவின் ஒரு பிரதிநிதியாக செயல்பட்டு அரசு பல்கலைக்கழக சட்டத்தினை புறம்தள்ளி பல்கலைக்கழக நிதிநல்கைக் குழுவிற்கு ஏற்றாற்போல் சாதமாக செயல்பட்டு வருகிறார். இனியாவது ஆளுநர் தனது செயல்பாட்டினை மாற்றிக்கொள்ள வேண்டும்' என்று அமைச்சர் கோவி. செழியன் தெரிவித்துள்ளார்.