சென்னை: சென்னையில் அரசுக்கு சொந்தமான ஆவின் நிறுவனம் மூலம் 14 லட்சம் லிட்டர் பால் பாக்கெட்டுகள் விற்பனை செய்யப்பட்டு வருகின்றன. இதில், ஒப்பந்த தொழிலாளர்கள் போராட்டம், பால் கொள்முதல் வரத்து குறைவு காரணமாக மாதவரம் மத்திய பால்பண்ணை, சோழிங்கநல்லூர், அம்பத்தூர் பால் பண்ணைகளுக்கு சுமார் 3 லட்சம் வரை பால் வரத்து குறைந்துள்ளது. இதன் காரணமாக இன்று(மார்ச்.14) இரண்டாவது நாளாக ஆவின் பால் விநியோம் பாதிக்கப்பட்டுள்ளது. இதனால் பொதுமக்கள் கடுமையாக பாதிக்கப்பட்டுள்ளனர்.
குறிப்பாக திருவல்லிக்கேணி, மயிலாப்பூர், வேளச்சேரி, பெருங்குடி, தாம்பரம், ராயப்பேட்டை உள்ளிட்ட பகுதிகளில் பால் விநியோகம் பாதிக்கப்பட்டுள்ளது. மேலும், சோழிங்கநல்லூர் ஆவின் பால் பண்ணைக்கு ஆவின் வரத்து குறைந்துள்ளதால், தென் சென்னையின் பல பகுதிகளில் பால் விநியோகம் பாதிக்கப்பட்டுள்ளது.
தமிழகம் முழுவதும் ஆவினில் பணிபுரிந்து வரும் ஒப்பந்த ஊழியர்கள் ஊதியத்தை உயர்த்த வேண்டும் என்று போராட்டத்தில் ஈடுபட்டு வந்தனர். பின்னர் அதிகாரிகள் சமரச பேச்சுவார்த்தையில் ஈடுபட்டு போராட்டத்தை வாபஸ் பெற வைத்தனர். இந்த நிலையில் சென்னையில் பால் தட்டுப்பாடு ஏற்பட்டுள்ளது.
இது குறித்து பால் முகவர்கள் சங்க தலைவர் பொன்னுசாமி வெளியிட்டுள்ள அறிக்கையில், "மாதாந்திர அட்டைதாரர்கள் மற்றும் மொத்த விநியோகஸ்தர்களின் 63 விநியோக வாகனங்கள் மூலம் சுமார் 4 லட்சம் லிட்டருக்கும் மேல் தினசரி நடைபெற்று வரும் விநியோகமானது, ஒப்பந்த தொழிலாளர்கள் பிரச்சினை, பால் வரத்து குறைவு காரணமாக சோழிங்கநல்லூர் ஆவின் பால் பண்ணை 2வது நாளாக முடங்கியது.
63 விநியோக வாகனங்களில் 4 வாகனங்கள் அம்பத்தூர் பால் பண்ணைக்கும், 2 வாகனங்கள் மாதவரம் பால் பண்ணைக்கும் திருப்பி விடப்பட்ட நிலையில் சுமார் 50-க்கும் மேற்பட்ட வாகனங்கள் சோழிங்கநல்லூர் ஆவின் பால் பண்ணையில் இருந்து காலை 8.00 மணி நிலவரப்படி விநியோகத்தை தொடங்கவில்லை.
அதுமட்டுமின்றி சோழிங்கநல்லூர் ஆவின் பால் பண்ணையை போன்று அம்பத்தூர் பால் பண்ணையிலும் அதே பிரச்சினை நிலவுவதால், தென்சென்னை மட்டுமின்றி மத்திய சென்னையின் பல்வேறு பகுதிகளிலும் ஆவின் பால் விநியோகத்தில் கடுமையான தட்டுப்பாடு ஏற்பட்டுள்ளது.
மேலும் நேற்று சோழிங்கநல்லூர் பால் பண்ணையில் இருந்து விநியோகம் செய்யப்பட வேண்டிய ஆவின் பால் பாக்கெட்டுகள் இன்றைய தேதியிட்டு உற்பத்தி செய்து பிற்பகல் வாக்கில் விநியோகம் செய்யப்பட்டது" என்று குறிப்பிட்டுள்ளார்.
இது குறித்து பேசிய ஆவின் நிறுவன அதிகாரிகள், "ஒப்பந்த தொழிலாளர்கள் பிரச்சினை, பால் கொள்முதல் வரத்து குறைவு காரணமாக ஏற்பட்ட பால் தட்டுப்பாடு சரிசெய்யப்பட்டது. அனைத்து மாவட்டங்களிலும் போராட்டம் நடத்தி வரும் ஊழியர்களிடையே அதிகாரிகள் பேச்சுவார்த்தையில் ஈடுபட்டு வருகின்றனர். இதனால், விரைவில் பால் விநியோகம் இயல்பு நிலைக்கு திரும்பும்" என கூறினர்.
இதையும் படிங்க: தமிழக மீனவர்களை மீட்க நடவடிக்கை - பிரதமர் மோடிக்கு முதலமைச்சர் கடிதம்!
