கோபால்சாமி ஜூன் 2006 முதல் ஏப்ரல் 2009 வரை தலைமைத் தேர்தல் ஆணையராக பணியாற்றியுள்ளார். பத்ம பூஷண் விருதும் பெற்றுள்ள இவரது பணிக்காலத்தின்போது மின்னணு வாக்கு பதிவு இயந்திரம் நாடு முழுவதும் அனைத்து தேர்தல்களிலும் அறிமுகப்படுத்தப்பட்டது. இந்த இயந்திரங்களில் முறைகேடு நடப்பதாக புகார் எழுந்துவரும் நிலையில், கோபால்சாமி அது குறித்து விளக்கமளித்துள்ளார்.
தேர்தலில் தோல்வியடைந்தவர்கள்தான் மின்னணு வாக்குப்பதிவு இயந்திரத்தில் முறைகேடு நடப்பதாக குற்றஞ்சாட்டி வருகின்றனர். மேலும் மேலை நாடுகளில் அது பயன்படுத்தவில்லை என்ற பொய்யைக் கூறி வருகின்றனர். 'டி ஆர் எஸ்' எனப்படும் இந்தக் கருவி பல வெளிநாடுகளில் பயன்படுத்தப்படுகிறது. குறிப்பாக பிரேசில், அமெரிக்கா போன்ற நாடுகளில் எலக்ட்ரானிக் வோட்டிங் மிஷின் பயன்படுத்தப்படுகிறது.
வெளிமாநிலத்தவர் 2 வாக்காளர் அடையாள அட்டை வைத்துள்ளது சரியானதல்ல. அதை தேர்தலுக்கு முன் வாக்காளர் அட்டை சரிபார்க்கும் அதிகாரிகள் கண்டறிய வேண்டும். அதற்கு வாக்களர்களும் ஒத்துழைக்க வேண்டும். அப்போதுதான் 2 வாக்காளர் அடையாள அட்டை வைத்திருப்பதை தடுக்க முடியும்.
100 விழுக்காடு வாக்குப்பதிவுக்கு தேர்தல் ஆணையமும் பல முயற்சிகளை எடுத்து வருகிறது. சிலர் சில காரணங்களால் ஓட்டளிக்க முடியாமல் போகிறது. பெரும்பாலும் கிராமங்களைவிட நகர்ப்புறங்களில் இருப்பவர்களே வாக்களிப்பதில்லை. படித்தவர்கள் தங்களது வாக்கினை பயன்படுத்த வேண்டும், அதைக் கடமை என அவர்கள் நினைக்க வேண்டும் என தெரிவித்தார்.
