தமிழ்நாடு முழுவதும் இருசக்கர வாகன ஓட்டிகள் ஹெல்மெட் அணிவது கட்டாயம் என்ற சட்டம் அமல்படுத்தப்பட்டுள்ள நிலையில், பொதுமக்கள் பலரும் ஹெல்மெட் அணியாமல் பயணிப்பதாக குற்றச்சாட்டு எழுந்த வண்ணம் இருந்தது. இது தொடர்பான பொதுநல வழக்கை விசாரித்த சென்னை உயர் நீதிமன்றம், கட்டாய ஹெல்மெட் சட்டத்தை அரசு முறையாக அமல்படுத்தவில்லை என கண்டனம் தெரிவித்தது.
குறிப்பாக ஹெல்மெட் அணியாதவர்கள் ஓட்டுநர் உரிமத்தை ஏன் ரத்து செய்யக்கூடாது எனவும், ஏன் வாகனத்தை பறிமுதல் செய்யகூடாது எனவும் நீதிமன்றம் பதிலளிக்க உத்தரவிட்டுள்ளது. இதனையடுத்து, சென்னையில் நூற்றுக்கும் மேற்பட்ட இடங்களில் போக்குவரத்து போலிசார் ஹெல்மெட் அணியாதவர்கள் மீது தீவிரமாக நடவடிக்கை மேற்கொண்டு வருகின்றனர்.
இதுதொடர்பாக செய்தியாளர்களிடம் பேசிய பெரியமேடு போக்குவரத்து ஆய்வாளர் சந்திரமெளலி கூறுகையில், “ஹெல்மெட் கட்டாயம் அணிய வேண்டும் ஏற்கனவே உயர் நீதிமன்ற உத்தரவு இருந்தும் அதனை சரியாக பின்பற்றாத வாகன ஓட்டிகள் மீது தீவிர நடவடிக்கை மேற்கொண்டு வருகிறோம்.
ஹெல்மெட் அணியாதவர்களிடம் உடனுக்குடன் அபராதம் வசூல் செய்துவிடுகிறோம். பழைய இயந்திரம் போல் அல்லாமல், தற்போது அரசு வழங்கியுள்ள அபராத இயந்திரம் மிக உதவியாக இருக்கிறது. அதேபோல், ஓட்டுநர் உரிமத்தின் எண்ணை பதிந்தாலே அனைத்து விபரங்களும் உடனுக்குடன் வந்துவிடுகிறது” என்று தெரிவித்தார்.
