அரியலூர்: வேலை வாய்ப்பற்ற இளைஞர்கள் நலன் கருதி வரும் 17ஆம் தேதி அரியலூர் அரசினர் கலைக் கல்லூரி வளாகத்தில் மாபெரும் வேலை வாய்ப்பு முகாம் நடத்தப்படும் என்று அரியலூர் மாவட்ட ஆட்சியர் ரமண சரஸ்வதி தெரிவித்துள்ளார். இதுகுறித்து அவர் தெரிவித்துள்ளதாவது, அரியலூர் மாவட்டம், தமிழ்நாடு மாநில ஊரக வாழ்வாதார இயக்கம், மாவட்ட இயக்க மேலாண்மை அலகின் மூலம் தீன் தயாள் உபாத்யாய கிராமின் கௌசல்யா யோஐனா (DDU-GKY) திட்டம் செயல்படுத்தப்பட்டு வருகிறது.
இந்த திட்டத்தின் மூலம் கிராமம் மற்றும் நகர்புறத்தில் உள்ள படித்து வேலைவாய்ப்பற்ற இளைஞர்கள் பயன்பெறும் வகையில் மாபெரும் தனியார் துறை வேலை வாய்ப்பு முகாம் 17.03.2023 அன்று (வெள்ளிக்கிழமை) அரியலூர் அரசினர் கலைக் கல்லூரியில் (காலை 09.00 மணி முதல் மாலை 03.00 மணி வரை) நடைபெற உள்ளது.
இம்முகாமில் (5 ஆம் வகுப்பு முதல் ஐடிஐ, டிப்ளமோ, இளநிலை, முதுநிலை பட்டப்படிப்பு மற்றும் பொறியியல் படித்த வேலைவாய்ப்பற்ற 18 முதல் 45 வயது வரை உள்ள இளைஞர்கள் ஆண்/பெண் (இருபாலரும்) திரளாக கலந்து கொண்டு வேலைவாய்ப்பினை பெற்று பயன் பெறுமாறு கேட்டுக் கொள்கிறேன்.
இந்த முகாமில் 100-க்கும் மேற்பட்ட தனியார் துறை முன்னணி நிறுவனங்கள் 10000க்கும் மேற்பட்ட காலி பணியிடங்களுடன் கலந்து கொள்ள உள்ளனர். மேலும், தீன் தயாள் உபாத்யாய கிராமின் கௌசல்யா யோஐனா (DDU-GKY) திட்டத்தின் கீழ் 20க்கும் மேற்பட்ட பயிற்சி நிறுவனங்கள் கலந்து கொண்டு பயிற்சியுடன் கூடிய வேலை வாய்ப்பினை இளைஞர்களுக்கு வழங்க உள்ளார்கள். வருகை தரும் அனைவரும் கட்டாயம் முகக் கவசம் அணிந்து வர வேண்டும்.
அத்துடன் தங்களது சுய விபர குறிப்பு (Bio –Data) ஆதார் அட்டை நகல், கல்விச் சான்றிதழ் நகல்கள் மற்றும் புகைப்படம் ஆகியவற்றுடன் கலந்து கொண்டு பயன் பெறுமாறு அனைவரும் கேட்டுக் கொள்ளப்படுகிறார்கள். இவ்வாறு அரியலூர் மாவட்ட ஆட்சியர் ரமண சரஸ்வதி தெரிவித்துள்ளார்.
இதையும் படிங்க: சோழர் பாசன திட்டத்தை செயல்படுத்த வேண்டும்.. துரைமுருகனுக்கு அன்புமணி ராமதாஸ் கடிதம்..
