சர்வதேச கைப்பந்து கூட்டமைப்பு சார்பில் நடைபெற்ற மகளிருக்கான உலகக்கோப்பை கைப்பந்து போட்டி ஜப்பானில் நடைபெற்றுவருகிறது. இதில் இன்று நடைபெற்ற நான்காவது சுற்று ஆட்டத்தில் செர்பியா அணி அர்ஜெண்டினா அணியை எதிர்கொண்டது.
ஆட்டம் தொடங்கியது முதலே தனது இயல்பான ஆட்டத்தை வெளிப்படுத்திய செர்பியா அணி முதல் செட்டை 25- 15 என்ற கணக்கில் கைப்பற்றியது. அதனைத் தொடர்ந்து ஆட்டத்தின் இரண்டாது செட்டை அர்ஜெண்டினா அணி 25-23 என்ற கணக்கில் போராடி வென்றது. அதன் பின் சாமர்த்தியமாக விளையாடிய செர்பியா அணி மூன்று மற்றும் நான்காவது செட்டை 25-23, 25-23 என்ற புள்ளிக்கணக்கில் கைப்பற்றியது.
இதன்மூலம் செர்பியா அணி 3-1 என்ற செட் கணக்கில் அர்ஜெண்டினா அணியை வீழ்த்தி மகளிர் உலகக்கோப்பை கைப்பந்து போட்டியின் ஐந்தாவது சுற்றுக்கு முன்னேறியுள்ளது.
இன்று நடைபெற்ற மற்றொரு நான்காவது சுற்று ஆட்டத்தில் ரஷ்யா அணி தென் கொரிய அணியை எதிர்கொண்டது. இப்போட்டியில் ரஷ்யா அணி 25-18, 29-27, 25-12 என்ற புள்ளிக்கணக்கில் தென் கொரிய அணியை வீழ்த்தி வெற்றிபெற்றது. இதன்மூலம் ரஷ்யா அணி மகளிர் உலகக்கோப்பை ஐந்தாவது சுற்றுக்கு முன்னேறியுள்ளது.
