ஜப்பான் தலைநகர் டோக்கியோவில் 32ஆவது ஒலிம்பிக் போட்டிகள் வரும் ஜூலை 24 முதல் ஆகஸ்ட் 9 வரை நடைபெறவுள்ளது. இதில், டேபிள் டென்னிஸ் போட்டியில் பங்கேற்பதற்கான தகுதிச் சுற்று ஆட்டங்கள் போர்ச்சுகல் நாட்டின் கோண்டோமோர் நகரில் நடைபெற்றுவருகிறது. இதன் காலிறுதிச் சுற்றில் முன்னேறும் அணி ஒலிம்பிக் போட்டிக்கு தகுதிப்பெறும்.
இந்த நிலையில், இந்தத் தகுதிச் சுற்றில் ஆடவர் அணிகளுக்கு இடையிலான முதல் போட்டியில் சரத் கமல், சத்யன், ஹர்மீத் தேசாய் அடங்கிய இந்திய அணி, லக்ஸம்பர்க் அணியை எதிர்கொண்டது. இதில், இரட்டையர் பிரிவில் சரத் கமல், ஹர்மீத் தேசாய் அடங்கிய இந்திய அணி 11-9, 16-14, 11-6 என்ற நேர் செட் கணக்கில் லக்ஸம்பர்க்கின் ஜைல்ஸ் மிச்லி - எரிக் கிளோட் இணையை வீழ்த்தி முதல் புள்ளியைப் பெற்றது.
இதைத்தொடர்ந்து, ஆடவர் ஒற்றையர் பிரிவில் லுகா மடோனோவிக்கிடம் முதல் இரண்டு செட்களில் தோல்வியடைந்த இந்தியாவின் சத்யன் அதன் பின் 11-3, 13-11, 11-6 என்ற கணக்கில் அடுத்த மூன்று செட்டை கைப்பற்றி வெற்றிபெற்றார். இதைத்தொடர்ந்து மற்றொரு ஒற்றையர் பிரிவில் சரத் கமல் 11-3, 11-3, 12-14, 11-5, என்ற செட் கணக்கில் எரிக் கிளோட்டை வீழ்த்தினார்.
இந்த மூன்று போட்டிகளில் வெற்றிபெற்றதன் மூலம், இந்திய ஆடவர் அணி 3-0 என்ற கணக்கில் லக்ஸம்பர்க் அணியை வீழ்த்தியது. இதைத்தொடர்ந்து, ஸ்லோவேனியா அணிக்கு எதிரான காலிறுதிக்கு முந்தைய சுற்றில் இந்திய ஆடவர் அணி மோதவுள்ளது.
இதேபோன்று, மகளிர் அணிகளுக்கு இடையிலான போட்டியில் இந்திய அணி 3-2 என்ற புள்ளிகள் கணக்கில் ஸ்வீடனை வீழ்த்தி காலிறுதி முந்தைய சுற்றுக்கு முன்னேறியுள்ளது.
இதைத்தொடர்ந்து நடைபெறவுள்ள காலிறுதிக்கு முந்தைய சுற்று ஆட்டங்களில் இந்திய ஆடவர், மகளிர் அணிகள் வெற்றிபெறும் பட்சத்தில் அவை ஒலிம்பிக் போட்டிக்கு முதல்முறையாக தகுதிபெறும். இதனால், இந்திய அணியின் மீதான எதிர்பார்ப்பு ரசிகர்கள் மத்தியில் அதிகரித்துள்ளது.
இதையும் படிங்க: ‘கோலி எனக்கு ஆதரவளிக்க வேண்டிய அவசியமே இல்லை... ஆனாலும் அளித்தார்’ - ஸ்டீவ் ஸ்மித் ஷேரிங்ஸ்!
