கிருஷ்ணகிரி மாவட்டம் நாகரசம்பட்டியில் நேரு ஹாக்கி கிளப், மோகன் நினைவு ஹாக்கி குழு சார்பில் 34ஆவது ஐந்து மாநில காவல் துறையினர் அணிகளுக்கு இடையிலான ஹாக்கிப் போட்டி நடைபெற்றது.
இதில், தமிழ்நாடு, ஆந்திரா, கர்நாடகா, கேரளா, புதுச்சேரி உள்ளிட்ட ஐந்து மாநிலங்களிலிருந்து 36 ஹாக்கி அணிகள் பங்கேற்று விளையாடின.
நாக் அவுட் முறையில் நடைபெற்ற இந்தத் தொடரில் புதுச்சேரி, தமிழ்நாடு, கேரளா, ஆகிய மாநிலங்களைச் சேர்ந்த 10 ஹாக்கி அணிகள் அடுத்த சுற்றுப் போட்டிக்கு முன்னேறி விளையாடியது. இந்நிலையில், நேற்று நடைபெற்ற இந்தத் தொடரின் இறுதிப் போட்டியில் சென்னை சிட்டி அணி தூத்துக்குடி மாவட்ட அணியை சந்தித்தது.
விறுவிறுப்பாக நடைபெற்ற இப்போட்டியில் சென்னை சிட்டி போலீஸ் அணி 5-0 என்ற கோல் கணக்கில் வெற்றிபெற்று சாம்பியன் பட்டத்தை வென்றது.
இதையடுத்து, இந்தத் தொடரில் சாம்பியன் பட்டம் வென்ற சென்னை சிட்டி அணிக்கு கூடுதல் காவல் கண்காணிப்பாளர் சக்திவேல் சுழல் கோப்பையையும் பரிசுத் தொகையும் வழங்கினார். இதேபோல, இரண்டாம் இடத்தைப் பிடித்த தூத்துக்குடி அணிக்கும் மூன்றாம் இடம் பிடித்த நாகரசம்பட்டி அணிக்கும் பரிசுகள் வழங்கப்பட்டன.
