ஆஸ்திரேலியா - இந்தியா அணிகளுக்கு இடையிலான மூன்று போட்டிகள் கொண்ட ஒருநாள் தொடரில் ஆஸ்திரேலியா அணி 2-0 என்ற கணக்கில் தொடரைக் கைப்பற்றியுள்ளது. இந்த இரு போட்டிகளிலும் இந்திய அணியின் பந்துவீச்சு பெரிய அளவில் இல்லை. இதற்கு முழுமையான காரணம் கேப்டன் விராட் கோலிதான் என முன்னாள் இந்திய வீரர் கம்பீர் தெரிவித்துள்ளார்.
இதுகுறித்து அவர் கூறுகையில், '' உண்மையை சொல்ல வேண்டுமென்றால் எனக்கு அவரின் கேப்டன்சி யுக்திகள் எதுவும் புரியவில்லை. நாம் அனைவருக்கும் விக்கெட்டுகள் வீழ்த்துவது எவ்வளவு முக்கியம் என்பது தெரியும். அதிலும் ஆஸ்திரேலியா மாதிரியான அணியின் பேட்டிங் வரிசையை வைத்து பார்த்தால், சீரான இடைவெளியில் விக்கெட் வீழ்த்தினால்தான் அவர்களை கட்டுப்படுத்த முடியும். அப்படி விக்கெட் வீழ்த்த வேண்டுமென்றால், நம்முடைய முக்கிய பந்துவீச்சாளரை சரியாக பயன்படுத்த வேண்டும்.
சாதாரணமாக ஒருநாள் போட்டிகளில் 4-3-3 என்ற கணக்கில்தான் ஸ்பெல்கள் கொடுக்கப்படும். ஆனால் விக்கெட் விழாத நேரங்களிலும் விராட் கோலி பும்ராவை இரண்டு ஓவர்களோடு தடுத்துவிட்டார். அது ஏன் என்று இப்போதுவரை புரியவில்லை. அவரின் கேப்டன்சியை புரிந்துகொள்ளவும் முடியவில்லை. இது டி20 கிரிக்கெட் அல்ல. இந்தப் போட்டியில் நாம் தோல்வியடைந்ததற்கு விராட் கோலியின் கேப்டன்சிதான் காரணம்.
அடுத்தப் போட்டியில் வாஷிங்டன் சுந்தர் அல்லது சிவம் தூபே ஆகியோருக்கு வாய்ப்பு வழங்கப்பட வேண்டும். அல்லது அணியில் உள்ள வேறு யாருக்கேனும் வாய்ப்புகள் வழங்க வேண்டும். அவர்கள் எப்படி ஆடுகிறார்கள் என்பதை பார்த்து, அவர்களை மதிப்பிட வேண்டும். நாம் அவர்களை மதிப்பிடும்வரை அவர்கள் சர்வதேச தரத்தில் எந்த அளவிற்கு சரியான வீரர்கள் என்று தெரியாது. ஆனால் சர்வதேச தரத்திலான வீரர்கள் அணியில் இல்லையென்றால், நிச்சயம் அணி தேர்வுக் குழுவின் தவறுதான் என்பேன்'' என்றார்.
ஐபிஎல் தொடரின்போது ஏற்கனவே விராட் கோலியை கடுமையாக விமர்சித்த கம்பீர், ரோஹித் ஷர்மாவை கேப்டனாக்க வேண்டும் என வலியுறுத்தியிருந்தார். தற்போது ஒருநாள் தொடரில் கோலி செய்த தவறுகளால், அவருக்கு எதிரான குரல்கள் வலுப்பெற்றுள்ளது.
இதையும் படிங்க: மேட்ச் ஜெய்க்கலனா என்னபா... இதயத்தை வென்ற இந்திய இளைஞர்...!
