நேபாளத்தின் தலைநகர் காத்மண்டு, போக்ஹராவில் 13ஆவது தெற்காசிய விளையாட்டு போட்டிகள் நடைபெற்றுவருகின்றன. இதில், நேற்று மகளிர் டி20 கிரிகெட் பிரிவில் வங்கதேசம் - மாலத்தீவு அணிகள் மோதின. இதில், முதலில் பேட்டிங் செய்த வங்கதேச அணியில் நிகர் சுல்தானா, ஃபர்கானா ஆகியோரது சதத்தால் 20 ஓவர்களில் இரண்டு விக்கெட்டுகளை இழந்து 255 ரன்களை குவித்தது. நிகர் சுல்தானா 65 பந்துகளில் 14 பவுண்டரி, மூன்று சிக்சர் என 113 ரன்களுடனும், ஃபர்கனா 53 பந்துகளில் 20 பவுண்டரிகளுடன் 110 ரன்களுடனும் இறுதிவரை ஆட்டமிழக்காமல் இருந்தனர்.
இதைத்தொடர்ந்து, 256 ரன்கள் என்ற கடின இலக்கை சேஸ் செய்ய தொடங்கிய மாலத்தீவு அணி ஓரளவிற்கு தாக்குப் பிடித்து விளையாடும் என்று எதிர்பார்க்கப்பட்டது. ஆனால், அந்த அணியோ 12.1 ஓவர்களில் ஆறு ரன்களுக்கே ஆல் அவுட்டானது. மகளிர் டி20 போட்டியில் குறைந்த ரன்களுக்கு அனைத்து விக்கெட்டுகளையும் இழந்த அணிகளின் பட்டியலில் மாலத்தீவு அணி, மாலி அணியுடன் முதலிடத்தைப் பகிர்ந்துக்கொண்டுள்ளது. முன்னதாக, ரிவாண்டன் அணிக்கு எதிரான கிவிபுக்கா டி20 தொடரில் மாலி அணி ஆறு ரன்களுக்கு ஆல் அவுட்டானது. குறிப்பிடத்தக்கது.
இதையும் படிங்க:டி20 கிரிக்கெட்: 6 ரன்களில் ஆல்-அவுட்டான அணி!
மாலத்தீவு அணியில் அணியில் ஷம்மா அலி (2), சஜா ஃபாத்திமாத் (1), கினாந்த இஸ்மாயில் (1) ஆகியோரைத் தவிர மற்ற எட்டு வீராங்கனைகளும் டக் அவுட்டானார்கள். இதனால், வங்கதேச அணி 249 ரன்கள் வித்தியாசத்தில் இமாலய வெற்றிபெற்றது. கிட்டத்தட்ட ஒரு பந்தில் அல்லது இரண்டு பந்தில் அடிக்க வேண்டிய ஸ்கோரை அந்த அணி 73 பந்தில் எடுத்தது.
அதிலும், மாலத்தீவு அணி சார்பில் அதிக பந்துகளை (18) எதிர்கொண்ட இஷல் இப்ராஹிம் ஒரு ரன்னும் எடுக்காமல் வங்கதேச வீராங்கனை நகிதா அக்தர் பந்துவீச்சில் போல்டானார். வங்கதேச அணி தரப்பில் ரித்து மோனி, சல்மா கடுன் ஆகியோர் தலா மூன்று விக்கெட்டுகளைக் கைப்பற்றினர்.
இதையும் படிங்க: 2.1 ஓவர்... 0 ரன்... ஆறு விக்கெட் ! டி20யில் உலக சாதனை படைத்த நேபாள வீராங்கனை
