இந்தியா, இங்கிலாந்து அணிகளுக்கு இடையேயான நான்காவது டெஸ்ட் போட்டியின்போது தனிப்பட்ட காரணங்களுக்காக இந்திய வேகப்பந்துவீச்சாளர் ஜஸ்பிரித் பும்ரா விலகினார்.
அதேபோல் இங்கிலாந்து அணிக்கெதிரான டி20, ஒருநாள் தொடரிலிருந்தும் பும்ராவிற்கு ஓய்வளிக்கப்பட்டுள்ளது. இந்நிலையில், பும்ரா திருமணம் செய்துகொள்ள போவதால்தான் அவருக்கு ஓய்வளிக்கப்பட்டுள்ளதாகத் தகவல்கள் வெளியாகின.
இதற்கிடையில் பும்ரா, தென்னிந்திய நடிகை ஒருவரை திருமணம் செய்யவுள்ளதாகவும் சமூக வலைதளங்களில் புரளிகள் கிளம்பின. ஆனால் இதற்கு மறுப்புத் தெரிவித்து நடிகை தரப்பிலிருந்து பதிலும் கிடைத்தது.
இந்நிலையில், மகராஷ்டிர மாநிலத்தைச் சேர்ந்த மாடல் மற்றும் விளையாட்டு நிகழ்ச்சிகளைத் தொகுத்து வழங்கும் தொகுப்பாளினி சஞ்சனா கணோஷனை பும்ரா திருமணம் செய்யவுள்ளதாகத் தகவல்கள் வெளியாகி, சமூக வலைதளங்களில் வைரலாகியுள்ளது.
மேலும் பும்ராவின் திருமணத்திற்கு குடும்பத்தின் முக்கிய நபர்கள் மட்டுமே பங்கேற்கவுள்ளதாகவும், அடுத்த வாரம் பும்ராவின் திருமணம் கோவாவில் நடைபெறும் என்றும் தகவல்கள் தெரிவிக்கின்றன.
ஆனால், பும்ராவின் திருமண செய்தி குறித்து அதிகாரப்பூர்வ தகவல்கள் ஏதும் வெளியாகவில்லை என்பதால், பும்ரா திருமணம் செய்துகொள்ள இருக்கும் பெண் யார் என்பது குறித்த குழப்பத்தில் ரசிகர்கள் உள்ளனர்.
இதையும் படிங்க: மாதத்தின் சிறந்த வீரருக்கான விருதை பெற்றார் அஸ்வின்!
