பல்வேறு மாநிலங்களில் பல பெயர்களுடன் புத்தாண்டை மக்கள் கொண்டாடிவருகின்றனர். இந்நிலையில், வீட்டில் இருப்பவர்கள் தங்களுக்குப் பிடித்தமானவர்களுடன் புதிய படங்களைக் கண்டு மகிழுமாறு பிரபல முன்னணி ஓடிடி நிறுவனமான அமேசான் ப்ரம் தெரிவித்துள்ளது. அதன்படி ஐந்து புதிய படங்களை ஸ்ட்ரீம் செய்வதாக அந்த நிறுவனம் அறிவித்துள்ளது.
ஜோஜி (மலையாளம்)
'சி யூ சூன்' படத்தின் மூலம் ஓடிடி தளத்தில் தனது தடத்தைப் பதித்த பஹத் பாசில் தற்போது 'ஜோஜி' மூலம் மீண்டும் ஓடிடி தளத்துக்கு வந்திருக்கிறார். 'ஜோஜி', க்ரைம் ட்ராமா வகையைச் சேர்ந்த மலையாளத் திரைப்படம்.
இப்படத்தை திலீஷ் போத்தன் இயக்கியுள்ளார். படத்தில் பாபுராஜ், ஷமி திலகன், பாஸில் ஜோசப் ஆகியோர் நடித்துள்ளனர். நாடகத் தந்தை ஷேக்ஸ்பியரின் 'மேக்பெத்' நாடகத்தால் ஈர்க்கப்பட்டு இக்கதை உருவாக்கப்பட்டுள்ளது.
மெய்சிலிர்க்கவைக்கும் ஒளிப்பதிவு, நாடி நரம்புகளை உறையவைக்கும் புதிர்கள் உங்களை இருக்கையின் நுனிக்கு அழைத்துவந்துவிடும் என்பதில் சந்தேகமில்லை. 2021 ஏப்ரல் 9இல் வெளியான இத்திரைப்படத்தை நீங்கள் பிரத்யேகமாக அமேசான் ப்ரைம் காணொலியில் காணலாம்.
ஜதி ரத்னலு (தெலுங்கு)
நகைச்சுவையும், கதை வசனமும் உங்களை ஆர்ப்பரிக்கவைக்கும். அனுதீப் கே.வி. எழுதி இயக்கியுள்ள இந்தப் படத்தில் நவீன் பொலிஷெட்டி, பிரியதர்ஷினி, ராகுல் ராமகிருஷ்ணா, ஃபரியா அப்துல்லா உள்ளிட்டோர் நடித்துள்ளனர். படம் முழுவதுமே கேலி, கூத்துக்குப் பஞ்சமிருக்காது.
வாழ்க்கையின் ஒவ்வொரு தருணத்திலும் நிகழ்விலும் மகிழ்ச்சியைத் தேடும் மூன்று ஆண்களைப் பற்றிய கதைதான் இது. வாழ்க்கையை மனதுக்குப் பிடித்ததுபோல் மகிழ்ச்சியாக வாழ்ந்து பார்த்துவிட வேண்டும் என்ற இலக்குடன் நகரத்துக்கு வரும் இந்த இளைஞர்கள் செய்யாத குற்றத்துக்காகச் சிறைக்குச் செல்கின்றனர்.
அதன்பின் நிகழ்வது எல்லாமே சிரிப்பு சர வெடியாக வெடிக்க நீங்களும் உங்கள் குடும்பத்தினரும் வயிறு குலுங்க சிரித்து படத்தை ரசிப்பீர்கள்.
யுவரத்னா (கன்னடம், தெலுங்கு, தமிழ்)
சந்தோஷ் ஆனந்த்ராம் இயக்கியுள்ள கன்னட ஆக்ஷன் திரைப்படமான 'யுவரத்னா'வில் புனீத் ராஜ்குமார், பிரகாஷ் ராஜ், சாயிஷா, சோனு கவுடா ஆகியோர் நடித்துள்ளனர். இந்தக் கதை புகழ்பெற்ற ஆர்.கே. பல்கலைக்கழகத்தைச் சுற்றிப் நடக்கும் நிகழ்வாகப் பின்னப்பட்டிருக்கும்.
இந்த பிரபல கல்வி நிலையம், கல்வித் துறை தனியார்மயமாக்கப்படுவதாலும், அரசியல் சதிகளாலும் மூடப்படும் நிலைக்கு வருகிறது. கல்லூரி முதல்வராக வரும் பிரகாஷ்ராஜும், அவருக்கு உண்மையான மாணவராக இருக்கும் புனீத் ராஜ்குமாரும் (கதாபாத்திரத்தின் பெயர் அர்ஜுன்) எப்படியெல்லாம் அரசியல் சுழலில் பகடைக்காய்களாகச் சிக்கி மீண்டுவருகின்றனர் என்பதே கதைக்கரு.
தி ப்ரீஸ்ட் (மலையாளம்)
அமானுஷ்யங்கள் பற்றிய இத்திரைப்படம் நிச்சயமாக உங்களை பயத்தில் உறையவைக்கும். ஜோபின் டி சாக்கோ இத்திரைப்படத்தை இயக்கியுள்ளார். மம்முட்டி, மஞ்சு வாரியர், நிக்கிலா விமல் ஆகியோர் நடித்துள்ள இத்திரைப்படம் விமர்சன ரீதியாகப் பெரும் வரவேற்பைப் பெற்றுள்ளது.
கதையம்சத்துக்காகவும், நினைத்துக்கூட பார்க்க முடியாத அளவுக்குப் புதிர்கள் நிரம்பிய திருப்பங்களுக்காகவும் படத்தை திரை விமர்சகர்கள் கொண்டாடித் தீர்த்துவிட்டனர். ஒரு பாதிரியாரின், அமானுஷ்ய திறமைதான் படத்தின் மையப்புள்ளி.
அந்தத் திறமையுடன் அவர் கையிலெடுக்கும் ஒவ்வொரு பிரச்சினையுமே பல அவிழ்க்கமுடியாத முடிச்சுகளுடன் கூடிய மர்மப் பெட்டகம்போல் விரிகிறது.
அன்பிற்கினியாள் (தமிழ்)
கீர்த்தி பாண்டியன், சி. அருண்பாண்டியன், பிரவீன் ராஜா ஆகியோர் இப்படத்தில் நடித்துள்ளனர். ஒரு பெரிய மாலில் உள்ள குளிர்பதனக் கூடத்தில் சிக்கிக்கொள்ளும் ஒரு பெண்ணைச் சுற்றி இத்திரைப்படம் பின்னப்பட்டுள்ளது.
அந்தப் பெண் தனது புத்திசாலித்தனத்தைப் பயன்படுத்தி மரணத்திலிருந்து தன்னை எப்படிக் காப்பாற்றிக் கொள்கிறார் என்பதைக் காட்சிக்கு காட்சி ஆச்சரியத்துடன் காட்டியிருக்கிறது இத்திரைப்படம்.
இவ்வாறு அமேசான் ப்ரைம் தெரிவித்துள்ளது.
