இந்தியத் திரையுலகில் புகழ்பெற்ற திரைப்படத் தயாரிப்பாளர்களுள் ஒருவராக மதிக்கப்படும் சத்யஜோதி பிலிம்ஸ் தியாகராஜன், இந்தியத் தொழில் கூட்டமைப்பின் ஊடக, பொழுதுபோக்கு பணிக்குழுவின் தெற்குப் பிராந்தியத் தலைவராக நியமிக்கப்பட்டுள்ளார்.
இதுகுறித்து டி. ஜி. தியாகராஜன் கூறுகையில், 'இந்தியத் தொழில்துறை கூட்டமைப்பு எனக்கு அளித்துள்ள இந்த கௌரவம் குறித்து நான் பெருமை அடைகிறேன். தற்பொழுது பிற தொழில் துறைகளைப்போலவே திரைத்துறையும் ஒரு மாபெரும் சவாலை எதிர்நோக்கியுள்ளது. இத்தகைய சிக்கலான காலகட்டத்தில் இப்படியான புதிய பொறுப்பை நான் பெற்றுள்ளதால், எனக்கு இன்னும் சவாலான பல பணிகள் காத்துள்ளன. அவற்றைச் செய்து முடிக்கும் நன்னாளை எதிர்நோக்கி நான் காத்திருக்கிறேன். திரைத்துறையில் எனது நீண்ட பயணம் எனக்குத் தந்துள்ள அனுபவத்தினால் எனது இப்புதிய பணியில் நான் வெற்றியை அடைவேன் என்று நம்புகிறேன். 125 வருட காலப் பாரம்பரியமிக்க இந்தியத் தொழில்துறை கூட்டமைப்பின் ஒரு பகுதியாக இருப்பதே ஒரு சிறப்புமிக்க கௌரவமாகும். என்னால் இயன்றவரை இப்பதவிக்கு மேலும் கௌரவத்தைச் சேர்க்க முயற்சி செய்வேன்' என்றார்.
டி. ஜி. தியாகராஜன் இதுவரை 5000க்கும் மேற்பட்ட சின்னத்திரை தொடர்களையும், 40 திரைப்படங்களையும் நான்கு தென்னிந்திய மொழிகளில் தயாரித்துள்ளார். ‘சத்யா மூவீஸ்’ என்ற புகழ்பெற்ற பட நிறுவனம் மூலம் ரஜினிகாந்த், கமல் ஹாசன், சிரஞ்ஜீவி, சிவாஜி கணேசன் போன்றோர் நடித்த படங்களை தயாரித்துள்ளார்.
இவர் சென்னை விவேகானந்தா கல்லூரியில் இளங்கலை வணிகப் பட்டத்தையும், கலிஃபோர்னியாவின் சாப்மன் பல்கலைக்கழகத்தில் வணிக நிர்வாகத்தில் முதுகலைப் பட்டத்தையும் பெற்றார். தமிழ்த் திரைப்படத் தயாரிப்பாளர் கழகத்தின் முன்னாள் தலைவராகவும், தென்னிந்திய திரைப்பட வர்த்தக சபையின் முன்னாள் கௌரவச் செயலராகவும் பணியாற்றியுள்ளார். மெட்ராஸ் கிரிக்கெட் க்ளப்பின் முன்னாள் தலைவராகவும், மத்திய அரசின் திரைப்படத் தணிக்கை வாரியத்தின் (CBFC) போர்டு உறுப்பினராகவும் பணியாற்றியுள்ள இவர், S.T.E.P.S. எனப்படும் தென்னிந்திய சின்னத்திரைத் தயாரிப்பாளர்கள் சங்கத்தைத் தோற்றுவித்து அதன் முதல் தலைவராகவும் இருந்தார். கலை, பண்பாட்டுத் துறைகளுக்கு இவர் ஆற்றியுள்ள சேவையை கௌரவிக்கும் பொருட்டு இவருக்கு தமிழ்நாடு அரசின் ‘கலைமாமணி’ விருது வழங்கப்பட்டது.
திரைப்படத் துறையிலேயே தன் வாழ்நாள் முழுவதையும் கழித்து வந்துள்ள டி. ஜி. தியாகராஜன் தனது மாமா ‘கலைவாணர்’ என்.எஸ். கிருஷ்ணன், அத்தை டி.ஏ. மதுரம் ஆகிய இருவரின் மாபெரும் ரசிகர் ஆவார்.
இதையும் படிங்க... நிதி நெருக்கடியால் நடிகர் சுஷாந்த் தற்கொலை?
