’பேட்ட’ படத்தை அடுத்து நடிகர் ரஜினிகாந்த் இயக்குநர் முருகதாஸ் இயக்கும் புதிய படத்தில் நடிக்க இருக்கிறார். இந்த படம் ரஜினிக்கு 167-வது படமாகும். ’தர்பார்’ என பெயரிடப்பட்டிருக்கும் இத்திரைப்படத்தின் ஃபர்ஸ்ட் லுக் போஸ்டர் வெளியாகி வைரலாகியுள்ளது.
லைகா நிறுவனம் தயாரிக்கும் இப்படத்துக்கு அனிருத் இசையமைக்கிறார். சந்தோஷ் சிவன் ஒளிப்பதிவு செய்கிறார். இதன் படப்பிடிப்பு நாளை (ஏப்ரல் 10) மும்பையில் தொடங்க உள்ளது. ஏ.ஆர்.முருகதாஸ் - ரஜினிகாந்துடன் முதன்முறையாக இணைந்திருப்பதால் இந்தப் படத்தின் மீதான எதிர்பார்ப்பு ரசிகர்களிடையே அதிகரித்துள்ளது.
இந்நிலையில் இப்படத்தில் ரஜினிக்கு ஜோடியாக நயன்தாரா நடிக்க ஒப்பந்தமாகியுள்ளார். இதுகுறித்து ரஜினியின் மக்கள் தொடர்பாளர் ரியாஸ் அஹமது தனது ட்விட்டர் பக்கத்தில், “தற்போதுவரை இந்தப் படத்தின் நாயகியாக நயன்தாரா மட்டுமே தேர்வாகியுள்ளார். படக்குழு குறித்து வெளியான இதர தகவல்கள் தவறானவை. அதிகாரப்பூர்வமற்ற தகவல்களை பரப்ப வேண்டாம்” என்று பதிவிட்டுள்ளார்.
நயன்தாரா ரஜினியுடன் இணையும் மூன்றாவது படம் இதுவாகும். ஏற்கனவே சந்திரமுகி, குசேலன் ஆகிய படங்களில் ரஜினிக்கு ஜோடியாக நயன் நடித்திருந்தது குறிப்பிடதக்கது.
