கடந்தாண்டு தீபாவளி ரேஸில் 'பிகில்' படத்துடன் வெளியாகி ரசிகர்களைப் பெரிதும் கவர்ந்து திரையரங்குகளில் வெற்றிக்கரமாக ஓடியப் படம் 'கைதி'. கார்த்தி நடித்திருந்த இந்தப் படத்தில், அவருக்கு ஜோடி, பாட்டு கிடையாது. ஆனால், இவற்றைப் போக்கும் விதமாக, அதிரடி ஆக்ஷன், சென்டிமென்ட் என, தனது அற்புதமான நடிப்பால், ஸ்கோர் செய்து 'டில்லி' கார்த்தி கைதட்டல் வாங்கினார்.
இயக்குநர் லோகேஷ் கனகராஜ் இயக்கிய இந்தத் திரைப்படத்திற்கு ரசிகர்கள் மட்டுமல்லாது, திரைத்துறையினரும் வரவேற்பும், பாராட்டும் தெரிவித்தனர். படம் பார்த்த அனைவருக்கும் 'கைதி' டில்லியைப் பிடித்துப் போய்விட்டது. தமிழ், தெலுங்கு ஆகிய இரண்டு மொழிகளிலும் வெளியான இப்படம், ரூ.100 கோடிக்கும் மேல் வசூலித்து சாதனை படைத்திருந்தது.
இப்படத்தை "ட்ரீம் வாரியர் பிக்சர்ஸ்" தயாரித்திருந்தது. இந்தியில் ரிலையன்ஸ் எண்டெர்டெயின்மென்ட்டும், டிரீம் வாரியர்ஸூம் இணைந்து தயாரிக்கும் இப்படத்தில் அஜய்தேவ்கன் நடிக்க உள்ளார். தற்போது, இப்படம் "இண்டர்நேஷனல் இந்தியன் ஃபிலிம் ஃபெஸ்டிவல் டொராண்டோ"வில் திரையிடப்பட உள்ளது. இந்தத் திருவிழா ஆகஸ்ட் 9 தேதி தொடங்கி, ஆகஸ்ட் 15 ஆம் தேதி வரை நடைபெறுகிறது. இந்தத் திருவிழாவில் தெலுங்கில் இருந்து நானி நடிப்பில் சூப்பர்ஹிட் அடித்த 'ஜெர்ஸி' திரைப்படமும் திரையிடப்பட உள்ளது என்பது குறிப்பிடத்தக்கது.
