ராகவா லாரன்ஸ் இயக்கி நடித்திருக்கும் திரைப்படம் 'காஞ்சனா-3'. காமெடி கலந்த ஹாரர் படமாக உருவாகியுள்ள இப்படத்தில் வேதிகா, ஓவியா, நிக்கி தம்போலி, கோவை சரளா, திவ்யதர்ஷினி, ஸ்ரீமன் ஆகியோர் நடித்துள்ளனர். ’முனி’ பட வரிசையில் நான்காவது பாகமாக உருவான இப்படம் கடந்த வாரம் ஏப்ரல் 19ஆம் தேதி வெளியானது. படம் வெளிவந்த நாள் முதல் ரசிகர்களின் அமோக வரவேற்பை பெற்று பாக்ஸ் ஆபிஸ் கலெக்சனில் 100 கோடியைத் தொட்டுள்ளதாக தகவல் வெளியாகியுள்ளது.
'காஞ்சனா-3' படத்தை விமர்சகர்கள் ஆதரிக்கவில்லை என்றாலும் பட விநியோகஸ்தர்கள், திரையரங்கு உரிமையாளர்கள் இப்படத்தின் வசூலால் மகிழ்ச்சியடைந்துள்ளனர். மேலும், ரசிகர்கள் குடும்பம், குடும்பமாக வந்து ரசிப்பதாக திரையரங்கு உரிமையாளர்கள் தெரிவித்துள்ளனர். உலகமெங்கும் வெளியான இப்படம் தமிழ்நாட்டில் மட்டும் 60 கோடி ரூபாயும், பிற மாநிலங்களில் 12 கோடி ரூபாயும், வெளிநாடுகளில் 38 கோடி ரூபாயும் வசூலித்துள்ளதாக தெரிவிக்கப்பட்டுள்ளது.
ராகவா லாரன்ஸ் நடித்த படங்களில் இதுவரை இல்லாத அளவிற்கு 'காஞ்சனா-3' படத்திற்கு மிகப்பெரிய ஓபனிங் கிடைத்துள்ளதால் படக்குழுவினர் மிகுந்த மகிழ்ச்சியில் உள்ளனர். இந்நிலையில், ராகவா லாரன்ஸ் 'காஞ்சனா' திரைப்படத்தை இந்தியில் ரீமேக் செய்துவருகிறார். இப்படத்தில் அக்சய் குமார் கதாநாயகனாக நடித்து வருவது குறிப்பிடத்தக்கது.
