சென்னை: நாளை (செப்டம்பர் 27ஆம் தேதி) வெளியாக இருக்கும் நம்ம வீட்டு பிள்ளை படத்தை 6 ஆயிரத்து 455 இணைய தளங்களில் வெளியிடத் தடை விதித்து சென்னை உயர் நீதிமன்றம் உத்தரவிட்டுள்ளது.
இயக்குநர் பாண்டிராஜ் இயக்கத்தில் சிவகார்த்திகேயன் நடித்துள்ள படம் "நம்ம வீட்டு பிள்ளை". இந்தப் படத்தை சன் பிக்சர்ஸ் நிறுவனம் தயாரித்துள்ளது.
பெரும் நட்சத்திரப் பட்டாளங்கள் நடிப்பில் உருவாகியிருக்கும் இப்படமானது நாளை (செப்டம்பர் 27ஆம் தேதி) வெளியாகிறது.
இந்த நிலையில், படத்தை இணைய தளங்கள் மற்றும் கேபிள் நிறுவனங்கள் வெளியிடத் தடை விதிக்கக் கோரி சன் நெட்வொர்க் நிறுவனம் சார்பில் சென்னை உயர் நீதிமன்றத்தில் வழக்கு தொடரப்பட்டிருந்தது.
இந்த வழக்கின் விசாரணை இன்று நடைபெற்றது. வழக்கை விசாரித்த நீதிபதி சதீஷ்குமார், நம்ம வீட்டு பிள்ளை திரைப்படத்தை 6 ஆயிரத்து 455 இணையதளங்களில் வெளியிடவும், பதிவிறக்கம் மற்றும் தரவிறக்கம் செய்யவும், லோக்கல் கேபிள் டிவி சேனல்களில் படத்தை வெளியிடவும் தடை விதித்து உத்தரவிட்டார்.
