முள்ளும் மலரும் போல கதை கிளாசிக்கா இருந்தது - ஜி.வி. பிரகாஷ் நேர்காணல்!

சிவப்பு மஞ்சள் பச்சை படத்தில் நடிகர் ஜிவி பிரகாஷ் நடித்த அனுபவம் பற்றி ஈடிவி பாரத்துக்கு சிறப்பு நேர்காணல் அளித்துள்ளார்.

'பிச்சைக்காரன்' படத்தின் வெற்றிக்குப் பிறகு இயக்குநர் சசி இயக்கியுள்ள திரைப்படம் 'சிவப்பு மஞ்சள் பச்சை'. சித்தார்த், ஜி.வி. பிரகாஷ் நாயகர்களாக நடித்துள்ள இத்திரைப்படத்தில் மலையாள நடிகை லிஜோமோல் ஜோஸ், தீபா இராமானுஜம் ஆகியோர் கதாநாயகிகளாக நடித்துள்ளனர்.

போக்குவரத்து காவலராக சித்தார்த்தும், பைக் ரேஸராக ஜி.வி. பிரகாஷும் நடித்துள்ளனர். அதிரடி சண்டைக் காட்சிகள் அட்டகாசமான பைக் சேசிங் காட்சிகளுடன் இப்படம் உருவாகியுள்ளது. இப்படத்தில் நடித்த அனுபவம் குறித்து ஜிவி பிரகாஷ் ஈடிவி பாரத்துக்கு சிறப்பு நேர்காணல் அளித்துள்ளார்.

’சிவப்பு மஞ்சள் பச்சை’ படத்தின் கதையை எப்படி தேர்வு செய்தீர்கள்

இந்தப் படத்தின் கதையைக் கேட்டவுடனேயே எனக்கு மிகவும் பிடித்து விட்டது. இது மல்டி ஹீரோ கதை என்று சசி என்னிடம் கூறினார். கதை கூறுங்கள் என்னுடைய கதாபாத்திரம் நன்றாக இருந்தால் நடிக்கிறேன் என்று கூறினேன்.

படத்தின் குழந்தைப்பருவ கதையை கேட்கும் பொழுது பாசமலர், முள்ளும் மலரும், கிழக்கு சீமையிலே போன்ற படம்போல் கிளாசிக்காக இருந்தது. இந்த உணர்வு ஆடியன்ஸுக்கு தற்பொழுது உள்ளது.

ஒரு மிடில் கிளாஸ் குடும்பத்தில் இருப்பவர்கள் இந்தக் கதையில் ஒன்றி போவார்கள். உங்கள் அக்காவிற்கும் உங்களுக்கும், உங்கள் தங்கைக்கும் உங்களுக்கும், உங்களுக்கும் உங்கள் மாமாவுக்கும் இடையே நடக்கும் கதையாக இது இருக்கும். இது குடும்பமாக பார்க்க வேண்டிய ஒரு படம்.

இந்த படத்தில் அதிகமான உணர்வுகளை வெளிப்படுத்தும் வகையில் நடித்துள்ளீர்கள், இதற்காக பயிற்சிகள் எடுத்தீர்களா?

கதாபாத்திரத்திற்கு நான் அதிகம் பயிற்சி எடுத்தேன். படத்தில் நான் ஒரு பைக் ரேஸர். இந்த கதாபாத்திரத்தை மிகச்சரியாக செய்ய வேண்டுமென்று பயிற்சிகள் செய்தேன். எமோஷன் காட்சிகளிலேயே இருந்தது, நானும் எமோஷனலான ஆள்தான். என்னுடைய தங்கையிடம் சிறு வயது முதல் நான் மிகவும் பொஸசிவாகதான் இருப்பேன். இதை எல்லாம் திரையில் பிரதிபலிக்க எனக்கு ஒரு பிளஸ் பாயிண்ட் ஆக இருந்தது.

ஒரு பைக் ரேஸரா நடித்த பிறகு என்ன புரிந்து கொண்டீர்கள்?

பைக் ரேஸ் என்பது எவ்வளவு ஆபத்தானது என்று தெரிந்துகொண்டேன். கண்டிப்பாக சாலை விதிமுறைகளை கடைப்பிடிக்க வேண்டும். வண்டி ஓட்டும்போது நம் வாழ்க்கை மட்டுமல்ல, சாலையில் பயணிப்பவர்கள் உயிரும் சார்ந்து உள்ளது என்பதை நாம் உணர வேண்டும். இது இந்த படத்தில் மிக அழகாக கூறப்பட்டிருக்கும்.

உங்களுடைய அடுத்த படங்கள் குறித்து

'ஐங்கரன்', அதற்கடுத்து வசந்தபாலன் இயக்கத்தில் 'ஜெயில்', '100 சதவிகித காதல்' என மூன்று படங்களும் இந்த ஆண்டு வெளியாகவுள்ளன.