பிரபல தனியார் தொலைக்காட்சியில் நடத்தப்பட்ட நாளைய இயக்குநர் நிகழ்ச்சியின் மூலம் பிரபலமானவர் கார்த்திக் சுப்பராஜ். குறும்பட இயக்குநராக இருந்து 'பீட்சா' படத்தின் மூலம் பெரிய திரையில் நிகழ்த்திய மேஜிக் ரசிகர்களால் இன்றுவரை கொண்டாடப்படுகிறது.
2012ஆம் ஆண்டு விஜய் சேதுபதி, ரம்யா நம்பீசன் ஆகியோர் நடிப்பில் வெளியான இப்படம் மாபெரும் ஹிட் அடித்தது. பீட்சாவின் வெற்றியைத் தொடர்ந்து பீட்சா -2ஆம் பாகமாக தி வில்லா என்ற பெயரில் 2013ஆம் ஆண்டு வெளியானது. அசோக் செல்வன், சஞ்சீதா ஷெட்டி ஆகியோர் நடிப்பில் வெளியான இப்படம், பீட்சா போன்று பெரிதளவில் சோபிக்கவில்லை.
பீட்சா, பீட்சா -2ஆம் பாகத்தையும் தயாரிப்பாளர் சி.வி. குமாரே தயாரித்திருந்தார். இரண்டாம் பாகம் வெளியாகி ஏழு வருடங்களை கடந்துள்ள நிலையில், தற்போது மீண்டும் சி.வி. குமார் தயாரிப்பில் பீட்சா படத்தின் மூன்றாம் பாகம் வெளிவர உள்ளது. பீட்சா 3, தி மம்மி என்ற பெயரில் உருவாகும் படத்தை அறிமுக இயக்குநர் மோகன் கோவிந்த் இயக்குகிறார்.
இப்படத்தில் மேகா, இதற்கு தானே ஆசைப்பட்டாய் பாலகுமாரா உள்ளிட்ட படங்களில் நடித்த அஸ்வின் கதாநாயகனாக நடிக்கிறார். காளிவெங்கட், கெளரவ் நாராயணன், ரவீனா தாஹா உள்ளிட்ட பலரும் முக்கியக் கதாபாத்திரத்தில் நடிக்கின்றனர்.
தற்போது பீட்சா 3, தி மம்மி படத்தின் பர்ஸ்ட் லுக் போஸ்டர் வெளியாகியுள்ளது. இப்படத்தின் முதல் பார்வையை இயக்குநர்கள் கார்த்திக் சுப்பராஜ், பா. இரஞ்சித், ராம்குமார் ஆகியோர் வெளியிட்டனர்.
இதையும் படிங்க: 100 ஆண்டுகளுக்கு முன் உலகம்: 1921ஆம் ஆண்டின் நினைவுத் துளிகள்!
