தமிழ் சினிமாவில் சமீபகாலமாக க்ரைம் திரில்லர் வகை படங்களுக்கு நல்ல வரவேற்பு கிடைத்து வருகிறது. அந்த வரிசையில் முழுக்க முழுக்க வித்தியாசமான கதைக்கருவுடன் திருப்பங்கள் நிறைந்த திரைக்கதையில் ’எதிர் வினையாற்று’ படம் உருவாகியுள்ளது.
இப்படத்தில் நாயகனாக அறிமுகமாகும் அலெக்ஸ், இளமைதாஸ் என்பவருடன் இணைந்து கதை, திரைக்கதை, வசனம் எழுதி இயக்கியும் உள்ளார்.
மருத்துவ நிபுணரான அலெக்ஸ் இப்படத்தை தயாரித்தும் இருக்கிறார். இப்படத்தின் நாயகியாக சனம் ஷெட்டி நடித்திருக்கிறார். மேலும் ஆர்.கே.சுரேஷ், ஆடுகளம் நரேன் உள்ளிட்டோரும் நடித்துள்ளனர். இப்படத்திற்கு ஷெரீப் இசையமைத்திருக்கிறார்.
எந்த வம்புக்கும் செல்லாமல் தான் உண்டு, தன் வேலை உண்டு என்று இருக்கும் போட்டோகிராஃபர் ஒரு நள்ளிரவு பயணத்தில் எதிர்பாராத விதமாக ஒரு பெண்ணை காப்பாற்றுகிறான். அந்த பெண்ணுடன் சேர்ந்து அவள் கொண்டு வரும் சிக்கல்களும் அவனைப் பின் தொடர்கின்றன. சாதாரண இளைஞனான அவன், மிகவும் அசாதாரண சூழ்நிலைக்குத் தள்ளப்படுகிறான். அதில் இருந்து அவன் எப்படி மீண்டு வருகிறான்? என்பதே எதிர் வினையாற்று படத்தின் கதையாக உருவாக்கப்பட்டுள்ளது.
இன்று இரவு தொடங்கி நாளை இரவுக்குள், 24 மணி நேரத்தில் நடக்கும் சம்பவங்களே விறுவிறுப்பான திரைக்கதையாகி உள்ளது. சென்னையில் இரண்டு ஆண்டுகளுக்கு முன்னர் நடந்த உண்மை சம்பவத்தை அடிப்படையாகக் கொண்டு இப்படம் உருவாக்கப்பட்டுள்ளது.
