சென்னை: மாநில அளவிலான துப்பாக்கி சுடும் போட்டியில் நடிகர் அஜித்குமார் 3 தங்கம், 4 வெள்ளிப் பதக்கங்களை வென்று சாதனை படைத்துள்ளார்.
சென்னை ரைபிள் கிளப் சார்பில் மாநில அளவிலான 46ஆவது துப்பாக்கி சுடும் போட்டி ஆவடி அடுத்த வீராபுரத்தில் உள்ள தமிழ்நாடு சிறப்பு காவல்படை 3ஆம் அணியில் தொடங்கியது. இந்தப் போட்டி கடந்த 3ஆம் தேதியிலிருந்து 7ஆம் தேதி வரை நடைபெற்றது. இதில், மாநிலம் முழுவதும் இருந்து 780க்கும் மேற்பட்ட மாணவர்கள் இளைஞர்கள் பங்கேற்றனர்.
மொத்தம் ஐந்து நாள்கள் பல்வேறு பிரிவுகளில் நடைபெற்ற போட்டியில் 180 பேர் வெற்றி பெற்றுள்ளனர். நடிகர் அஜித்குமார் சீனியர் பிரிவில் பங்கேற்று 25 மீட்டர் துப்பாக்கி சுடுதலில் 3 தங்கம், 10 மீட்டரில் 2 வெள்ளி, 15 மீட்டரில் 2 வெள்ளிப் பதக்கங்களை வென்று சாதனை படைத்துள்ளார்.
இந்த வெற்றியின் மூலம் அடுத்த மாதம் டெல்லியில் நடைபெறும் தேசிய அளவிலான துப்பாக்கி சுடும் போட்டியில் அஜித் தேர்வாகியுள்ளார். கடந்த 2019ஆம் ஆண்டு முதல் நடிகர் அஜித் சென்னையில் உள்ள ரைபிள் கிளப்பில் துப்பாக்கி சுடும் பயிற்சி பெற்று வருகிறார்.
துப்பாக்கி சுடுதல் போட்டியில் பதக்கங்களை அள்ளிய அஜித்துக்கு பிரபலங்களுக்கும், ரசிகர்களும் தங்களது பாராட்டுகளை தெரிவித்து வருகின்றனர். தல என்று ரசிகர்களால் அன்புடன் அழைக்கப்படும் அஜித் நடிகனாக மட்டுமில்லாமல் தனது தனித்திறமைகளை வெளிப்படுத்தி இளைஞர்களுக்கு முன்மாதிரியாக திகழ்ந்து வருகிறார்.
இதையும் படிங்க: இயக்குநருக்கு கார் பரிசளித்த தயாரிப்பாளர்!
