கிருஷ்ணா இயக்கத்தில் டேக் ஓகே கிரியேஷன்ஸ் சார்பில் தயாராகும் படம் 'மிரட்சி'. இந்தப் படத்தில் நடிகர் 'ஜித்தன்' ரமேஷ் சவாலான வில்லன் கதாபாத்திரத்தில் நடிக்கிறார். மேலும் இவருடன் பாலிவுட் நடிகை ஷ்ரத்தா தாஸ், கொல்கத்தாவை சேர்ந்த இனாசஹா, அஜெய்கோஸ், சாய், சனா, நிக்கிதா அனில்குமார் ஆகியோர் நடித்துள்ளனர்.
இந்தப் படம் குறித்து இயக்குனர் கிருஷ்ணா கூறுகையில், 'மிரட்சி' படத்தை முழுக்க முழுக்க திரில்லர் கதையாக உருவாக்கி இருக்கிறோம். கோவாவில் நடந்த ஒரு உண்மைச் சம்பவத்தை அடிப்படையாகக்கொண்டு திரைக்கதை உருவாக்கப்பட்டுள்ளது.
ஜித்தன் ரமேஷ் இதுவரை நடித்திராத ஒரு நடிப்பை பார்க்கலாம். ஒட்டுமொத்த நடிகர், நடிகைகள், தொழில்நுட்ப கலைஞர்கள் அனைவரையும் வைத்து தொடர்ந்து 3 நாட்கள் ஒருமணி நேரம் இடைவேளைவிட்டு படப்பிடிப்பை நடத்தி கிளைமாக்ஸ் காட்சிகளை படம் பிடித்தோம். மிகவும் சிரமப்பட்டு எடுத்த அந்தக் காட்சிகளை திரையில் பார்க்கும் போது மிக பிரமிப்பாக இருக்கும். படப்பிடிப்பு முழுவதும் கோவா, அதன் சுற்றுவட்டாரப் பகுதிகளில் நடை பெற்றது. தற்போது படத்தின் இறுதிக்கட்ட பணிகள் நடைபெற்று வருகின்றன.
