தமிழில் முதல்முறையாக ’ஆடுகளம்’ படத்தில் களமிறங்குகிறார் தப்ஸி. இவருக்காகவே அத்திரைப்படத்தில் பாடல் ஒன்றும் இடம்பெற்றது. அப்பாடலே தமிழ் ரசிகர்களின் கவனத்தை அவர் பக்கம் ஈர்த்தது என்றே கூறலாம். தனது முதல் படத்திலேயே ரசிகர்களின் மனதில் பதிந்து போனார் தப்ஸி. அதன் பிறகு தெலுங்கு, இந்தி எனத் தொடர்ந்து படங்களில் கமிட் ஆகி வந்த தப்ஸி, ’பிங்க்’ திரைப்படத்திற்குப் பிறகு அவரது முதிர்ந்த நடிப்புக்காக அதிக கவனம் பெறத் தொடங்கினார். இந்தத் திரைப்படம் தேசிய விருதையும் தட்டிச் சென்றது.
இதன் பிறகு நாம் ’ஷபானா’, ’த காசி அட்டாக்’ போன்ற திரைப்படங்களில் தனது சிறப்பான நடிப்பை வெளிபடுத்தியிருந்தார். இவரது கோர்ட்ரூம் ட்ராமா திரைப்படமான ’முல்க்’ (2018) திரைப்படம் விமர்சன ரீதியாக அதிக கவனம் பெற்றது. இத்திரைப்படம் இஸ்லாமியர்கள் பலரும் தீவிரவாதத்துடன் தொடர்புடையவர்கள், தீவிரவாதத்தை ஆதரிப்பவர்கள் என்ற பொதுபுத்தியை உடைத்தெரிந்தது.
அதனைத் தொடர்ந்து தப்ஸி பெண்களுக்கு முக்கியத்துவம் கொடுக்கும் கதைக்களத்தை தேர்வு செய்து நடிக்க ஆரம்பித்தார். 2019ஆம் ஆண்டு அமிதாப் பச்சனுடன் பத்லா, கேம் ஓவர் உள்ளிட்ட திரைப்படங்களில் நடித்திருந்தார். அந்த ஆண்டில் சுதந்திர தினத்தன்று வெளியான ’மிஷன் மங்கல்’ திரைப்படத்தில் முக்கியக் கதாபாத்திரத்தில் தப்ஸி நடித்தார்.
ஷார்ப்ஷூட்டர்கள் சந்திரோ, பிரகாஷி தோமரின் வாழ்க்கையை தழுவி எடுக்கப்பட்ட ’சாந்த் கி ஆங்க்’ திரைப்படத்தில் தப்ஸி, பூமி பெத்னேகர் ஆகியோர் நடித்தனர்.
கடந்த 2020ஆம் ஆண்டு தப்ஸி நடித்திருந்த ’தப்பட்’ திரைப்படம் பெரும் வரவேற்பைப் பெற்றது. அதற்காக தப்ஸி பிலிம்பேர் விருதையும் பெற்றார். தான் நாள் முழுக்க அன்பாக பார்த்துக்கொள்ளும் கணவன் தன்னை பலர் முன்னிலையும் அறைந்த பிறகு, அதனை ஏற்க முடியாமல் சுயமரியாதை காரணமாக அவனை விவாகரத்து செய்யும் பெண்ணின் கதையை மையமாக வைத்து தப்பட் எடுக்கப்பட்டது. இத்திரைப்படத்தின் கதைக்களமும், தப்ஸியின் நடிப்பும் பலரையும் கவனிக்க வைத்தது.
அண்மையில் தப்ஸியின் நடிப்பில் வெளியான ஹசீன் தில்ரூபா திரைப்படம் கலவையான விமர்சனத்தை பெற்றாலும், தப்ஸியின் கைதேர்ந்த நடிப்புக்காக பாராட்டப்பட்டது. தற்போது தயாரிப்பாளர் அவதாரம் எடுத்திருக்கும் தப்ஸி ப்ளர் என்னும் திரைப்படத்தை தயாரிக்கவுள்ளதாக அறிவித்துள்ளார்.
தன்னை பாலிவுட் நடிகை என பலர் அடையாளப்படுத்தினாலும், தப்ஸி தன்னை தென்னிந்திய நடிகையாகவே அங்கிகரித்து வருகிறார். தொடர்ந்து சமூக பிரச்னைகளுக்காக குரல் கொடுத்து வரும் இவர், சினிமாவில் நிலவும், பாலின வேற்றுமை குறித்தும் கருத்து தெரிவித்து வருகிறார். கதைத் தேர்வு, நடிப்பு என சினிமாவில் மற்ற நடிகைகளுக்கு முன்மாதிரியாய் விளங்கும் தப்ஸி நடிப்பில் மேன்மேலும் உச்சம் தொட வாழ்த்துவோம்...
இதையும் படிங்க: இசையின் ஜீவனை மீட்க மீண்டும் வாருங்கள் ஜி.வி.!
