விரைவில் வெளிவரயிருக்கும் ஹவுஸ்ஃபுல் 4 படத்தின் ப்ரொமோஷனுக்காக, மும்பை முதல் டெல்லிவரை சிறப்பு ரயிலில் வந்திருந்த பிரபல பாலிவுட் நடிகர் அக்ஷய் குமார், கோட்டா ரயில் நிலையத்தில் வெளியே வந்து அவரது ரசிகர்களை சந்திக்காததால் ரசிகர்கள் ஏமாற்றமடைந்தனர்.
இந்திய ரயில்வேத்துறையால் புதிதாக அறிமுகப்படுத்தப்பட்டிருக்கும் ப்ரொமோஷன் ஆன் வீல்ஸ் வசதியின் கீழ் முதல் ஆளாக அனுமதி பெற்று, தனது படத்தின் ப்ரொமோஷன் பணிகளை ரயில் மூலம் துவங்கியுள்ள அக்ஷய் குமாருடன், ஹவுஸ்ஃபுல் 4 படக்குழுவினரான க்ரிதி சேனன், பூஜா ஹெக்டே, ரித்தேஷ் தேஷ்முக், க்ரிதி கர்பண்டா, பாபி தியோல் ஆகியோரும் உடன் இருந்தனர். ஹவுஸ்ஃபுல் 4 எனப் பெயரிடப்பட்டு மும்பையிலிருந்து புதன்கிழமை மதியம் புறப்பட்ட இந்த ரயில், இன்று அதிகாலை கோட்டா ரயில் நிலையத்தை வந்தடைந்தது.
அக்ஷய் குமாரை ஒரு தடவையாவது பார்த்துவிட மாட்டோமா!’ என்ற ஏக்கத்துடன் கோட்டா ரயில் நிலையத்தின் முன் திரண்ட அவரது ரசிகர்கள், அக்ஷய் ஜன்னலின் வழியாகக் கூட அவர்களுக்கு கை அசைக்காததால் பெரும் ஏமாற்றமடைந்தனர். இந்தப் படத்தின் ஷைதான் கா சாலா, ஏக் சும்மா பாடல்கள் இணையத்தில் வெளியாகி ஏற்கனவே ஹிட்டடித்துள்ள நிலையில், அக்டோபர் 26 தீபாவளி பண்டிகையை முன்னிட்டு வெளியாக இருக்கும் ஹவுஸ்ஃபுல் 4 படத்திற்கு பலத்த எதிர்ப்பார்ப்பு கூடியுள்ளது.
இதையும் படிங்க: இனி அடிக்கடி பார்க்கலாம்... 'அசுரன்' படத்தை கைப்பற்றிய தொலைக்காட்சி சேனல்!
