மூத்த பத்திரிகையாளர் பிரின்ஸ் ஜெபக்குமார் எழுதிய கட்டுரையின் தமிழாக்கம் :
வருகின்ற சட்டப்பேரவை தேர்தலில் ஓவைசியின் அகில இந்திய மஜ்லிஸ்-இ-இத்தேஹாதுல் முஸ்லிமீன் (AIMIM) டிடிவி தினகரனின் அம்மா மக்கள் முன்னேற்ற கழகத்துடன் கூட்டணியை உருவாக்கி, மூன்று தொகுதிகளில் போட்டியிடுகிறது. அசாதுதீன் ஓவைசி தமிழ்நாட்டில் முக்கிய சக்தியாக மாறுவாரா? அவருக்கு என்ன கிடைக்கும்? அவரது உதவி தற்போதைய அதிமுகவை நீக்குவதற்கான அமமுகவின் திட்டத்திற்கு ஓரளவாவது உதவுமா? அல்லது இது வாக்குகளை பிரிப்பதற்கு வழிவகுக்குமா? என்பது மற்றொரு கேள்வி.
பிகாரில் ஏஐஎம்ஐஎம் கட்சி ஐந்து தொகுதிகளை வென்றது போலல்லாமல், தமிழ்நாட்டில் போட்டியிடும் மூன்று தொகுதிகளில் ஏதேனும் ஒன்றை வெல்லும் வாய்ப்புகள் குறைவாகவே உள்ளன. தற்போதைய கூட்டணியில் அமமுக வலுவான பாஜக எதிர்ப்பு நிலைப்பாட்டை எடுக்க வாய்ப்புள்ளது என்பதால் ஓவைசிக்கு விமர்சகர்கள் கூறும் பிஜேபி-பி அணி என்ற பிம்பத்தைத் துடைக்க உதவும். அமமுகவை பொறுத்தவரை, மக்களவை தேர்தல் 2019ஆம் ஆண்டு அதிமுக தோல்வி அடைந்த இடங்களில் அது பெற்றுள்ள தற்போதைய வாக்குகளை அதிகரிக்க இந்த தேர்தல் உதவும்.
M-காரணி
2011 மக்கள் தொகை கணக்கெடுப்பின்படி, தமிழ்நாட்டின் மக்கள் தொகை மொத்தம் 7.21 கோடி ஆகும். அதில், முஸ்லீம்கள் 6 விழுக்காடாக உள்ளனர். அதாவது 42 லட்சமாகும். சில தொகுதிகளில் இந்த வாக்கு வித்தியாசம் சில ஆயிரம் இருந்தாலும், எந்தவொரு தொகுதியிலும் வாக்கு வித்தியாசம் 1 லட்சத்தை தாண்டாது. அவர்கள் சிறுபான்மையினராக இருப்பதால், அவர்களை இழுபறிக்கு கொண்டுவர முடியுமே தவிர தனித்து நின்று வெல்ல முடியாது.
கடந்த சட்டப்பேரவைத் தேர்தலில் மாநிலம் முழுவதும், 10 இடங்களில் வெற்றி வித்தியாசம் ஆயிரத்திற்கும் குறைவாகவும், சுமார் 25 இடங்களில் 3 ஆயிரத்திற்கும் குறைவாகவும் இருந்தது. இதைக் கருத்தில் கொண்டு, இருப்பெரும் திராவிட கட்சிகளும் முஸ்லீம் கட்சிகளை தங்கள் அணியில் இணைத்துக் கொண்டு தங்கள் வாய்ப்புகளை அதிகரிக்கிறார்கள்.
கடந்த 2016இல் திமுக கூட்டணியில் இந்தியன் யூனியன் முஸ்லீம் லீக், மனிதநேய மக்கள் கட்சி ஆகிய இரண்டு முஸ்லீம் கட்சிகள் இருந்தன. ஐந்து இடங்களில் போட்டியிட்ட ஐ.யூ.எம்.எல் ஒன்றில் வென்றது, மூன்று இடங்களில் போட்டியிட்ட ம.ம.க எதிலும் வெல்லவில்லை. மனிதநேய ஜனநாயக கட்சி, தமிழ் மாநில முஸ்லீம் லீக் ஆகிய இரண்டும் அதிமுகவுடன் இணைந்து, தலா ஒரு இடத்தில் போட்டியிட்டு அந்தத் தேர்தலில் தோல்வியடைந்தன.
திமுகவுடனான கூட்டணி முயற்சி
ஓவைசியுடன் இணைந்து செயல்பட திமுக விரும்பவில்லை, ஏனெனில் அவர் ஒரு வெளிமாநிலத்தவராகவும், பாஜக-பி அணியாகவும் பார்க்கப்படுகிறார். இதனை ஏஐஎம்ஐஎம் உள்ளூர் அமைப்பு உறுதிப்படுத்துகிறது. தமிழ்நாட்டில் சட்டப்பேரவைத் தேர்தலில் இரண்டாவது முறையாக களமிறங்கும் ஓவைசியின் கட்சி, தனியாக போட்டியிடுவதாக இருந்தால், கிட்டத்தட்ட 40 இடங்களில் போட்டியிட திட்டம் தீட்டியது.
பாஜக எதிர்ப்பு பரப்புரையில் திமுக வலுவாக இருப்பதால், தமிழ்நாட்டில் நுழைய இது உதவும் என்று நம்பி, திமுக கூட்டணியில் நுழைய ஏஐஎம்ஐஎம் முடிவு செய்தது. திமுகவுடன் ஒரு நெருக்கத்தை ஏற்படுத்த பல முயற்சிகள் மேற்கொள்ளப்பட்டன. ஆனால் அந்த கட்சியிடமிருந்து எந்தவொரு பதிலும் வரவில்லை என்பதால், ஓவைசியின் கட்சி அமமுக கதவுகளை தட்டியது.
முன்னதாக ஜனவரி மாதத்தில், திமுக மாநிலத்தில் உள்ள கூட்டணி கட்சிகளை சமரசம் செய்ய தனது சிறுபான்மை பிரிவு மாநாட்டை இரண்டு மாதங்களுக்கு முன்பு நடத்தியபோது, ஓவைசிக்கு அனுப்பிய அழைப்பை வாபஸ் பெற்றது. தொடக்கத்தில், ஓவைசியை அழைக்க திமுக மறுத்ததாக கூறியது. ஆனால், ஓவைசி ஒரு வீடியோவை வெளியிட்டு அழைத்தது உண்மை என்றார்.
ஓவைசியின் வசீகரம்
இந்திய யூனியன் முஸ்லிம் லீக்கை தவிர மற்ற முஸ்லீம் கட்சிகள் தமிழ்நாட்டில் மட்டுமே பிரபலமாக உள்ளன. மேலும் தமிழ்நாட்டிற்குள் மட்டுமே அவற்றின் செயல்பாடுகள் உள்ளன. மாநிலத்தில் காங்கிரஸ் அதிகாரத்திலிருந்து வெளியேற்றப்பட்டதிலிருந்து அவர்கள் இரு திராவிடக் கட்சிகளுடனும் கூட்டணி வைத்து வந்தனர்.
ஓவைசியின் தலைமை,பிகார் சட்டப்பேரவை தேர்தலில் ஏஐஎம்ஐஎம் பெற்ற வெற்றி ஆகியவை இஸ்லாமியர்கள் அதிகம் வாழும் பகுதிகளில் அவரை நோக்கி செல்ல வாய்ப்பாக மாறலாம். இது அமமுகவிற்கு சில ஆயிரம் வாக்குகளைப் பெற உதவுவதோடு மட்டுமல்லாது அதன் வாக்கு விழுக்காட்டையும் அதிகரிக்கும். இவர்களின் வாக்குவங்கி அதிகரிக்கும் பட்சத்தில் அது அதிமுகவின் வெற்றி வாய்ப்புகளை பாதிக்கும்.
மேற்கு வங்கத்தை எதிர்பார்த்துக் கொண்டிருக்கும்போதும், ஏற்கனவே மகாராஷ்டிரா, குஜராத்தில் நடந்த உள்ளாட்சி தேர்தல்களிலும் தனது கணக்கை தொடங்கிய நிலையில் கூட, தமிழ்நாட்டில் ஓவைசியால் மொத்த முஸ்லீம் மக்களையும் ஒரே நேரத்தில் வசீகரிக்க முடியாமல் போகலாம்.
