செங்குன்றம் - திருவள்ளூர் நெடுஞ்சாலையில் உள்ள பூச்சிஅத்திப்பேடு பகுதியில் பெட்ரோல் பங்க் ஒன்று உள்ளது. இங்கு நாள்தோறும் இரவில் நான்கு ஊழியர்கள் காவலுக்காக தங்கியிருப்பர்.
இந்நிலையில், கடந்த மாதம் 13ஆம் தேதி விடியற்காலை ஒரு மணி அளவில் மோட்டார் சைக்கிளில் வந்த மூன்று நபர்கள் பெட்ரோல் பங்க் ஊழியர்களை கத்தியைக் காட்டி மிரட்டி, பீரோவை திறக்கச் செய்து, அதில் இருந்த ரொக்கம் ரூ.1.5 லட்சத்தை கொள்ளையடித்துக் கொண்டு தப்பிச் சென்றனர்.
இதுகுறித்து பங்க் ஊழியர் கொடுத்த புகாரின் பேரில் காவல் துறையினர் கண்காணிப்புக் கேமராவில் பதிவான காட்சிகளைக் கொண்டு கொள்ளையர்களை தேடி வந்தனர்.
கொள்ளையில் ஈடுபட்ட சதீஷ் மற்றும் சக்திவேல் ஆகிய இருவரையும் கடந்த மாதம் 24ஆம் தேதி, கைது செய்து நீதிமன்றத்தில் ஆஜர்படுத்தி புழல் சிறையில் அடைத்தனர்.
தற்போது இந்த வழக்கில் தலைமறைவாக இருந்த வெங்கடேசன் (23) என்பவரை கொமக்கம்பேடு கிராமம் அருகே வெங்கல் பகுதி காவல்துறையினர் கைது செய்து திருவள்ளூர் நீதிமன்றதில் ஆஜர்படுத்தினர். பின்னர் வெங்கடேசன் புழல் சிறையில் அடைத்தனர்.
இதையும் படிங்க: வாகன ஓட்டிகளிடம் வழிப்பறி செய்யும் கொள்ளை கும்பல் கைது!
