திண்டுக்கல் மாவட்டம் கொடைக்கானல் காந்திபுரம் பகுதியைச் சேர்ந்தவர் சுரேஷ்ராஜா (32). இவரது மனைவி ஷீபா. இவர்களுக்கு ஒரு பெண் குழந்தை, ஒரு மகன் உள்ளனர். இரண்டு வருடங்களுக்கு முன் கருத்து வேறுபாடு காரணமாக ஷீபா பெண் குழந்தையுடன், தனது தந்தை வீட்டிற்குச் சென்றுவிட்டார். மகன் சஞ்சயை சுரேஷின் அத்தை வளர்த்துவருகிறார்.
சுரேஷ் ராஜா திருப்பூர் மாவட்டத்தில் ஓட்டுநராகப் பணியாற்றிவந்தார். கடந்த ஜூன் மாதம் பல்லடத்தில் திருட்டு வழக்கில் கைதுசெய்யப்பட்டு கோவை சிறையில் அடைக்கப்பட்ட சுரேஷ், செப்டம்பர் 23ஆம் தேதி பிணை பெற்று வெளியே வந்தார். ஆனால், அன்று மாலை கோவை பீளமேடு காவல் துறையினர் மூலம் வேறொரு திருட்டு வழக்கில் மீண்டும் கைதாகி கோவை மத்திய சிறையில் அடைக்கப்பட்டார்.
இந்நிலையில், நேற்று (அக். 14) கோவை மத்திய சிறையில் சுரேஷ் ராஜா தூக்கிட்டுத் தற்கொலை முயற்சியில் ஈடுபட்டதாகக் கூறப்படுகிறது. அவரை மீட்ட சிறைக் காவலர்கள் கோவை அரசு மருத்துவமனைக்கு சிகிச்சைக்காக அழைத்துச் சென்றபோது, அவர் ஏற்கனவே இறந்துவிட்டதாக மருத்துவர்கள் தெரிவித்துள்ளனர்.
தகவலறிந்து வந்த அவரது உறவினர்கள் சுரேஷ்ராஜா தற்கொலை செய்துகொள்ள வாய்ப்பில்லை. அவரது இறப்பில் சந்தேகம் இருக்கிறது. இதுதொடர்பாக கோவை ஆட்சியர் தலையிட்டு உரிய நீதி வழங்கிட நடவடிக்கை எடுக்கக்கோரி ஆட்சியர் அலுவலகத்திற்கு மனு அளிக்க வந்தனர்.
இது குறித்து பேசிய சுரேஷ் ராஜாவின் அத்தை, "சுரேஷ்ராஜா என்னை சில தினங்களுக்கு முன்பு தொலைபேசியில் தொடர்பு கொண்டபோது சிறையில் தனக்கு உணவு வழங்கப்படவில்லை என்று கூறினார். தன்னை உடனடியாக பிணையில் எடுக்கும்படி வற்புறுத்தினார். கண்டிப்பாக அவர் தற்கொலை செய்துகொள்ள வாய்ப்பில்லை" என்று கண்ணீர் மல்க கூறினார்.
இதையும் படிங்க: முரளிதரன் ஒரு இனத்துரோகி, 800 படத்தில் நடிப்பதை தவிர்க்க வேண்டும் - பாரதிராஜா கடிதம்
