சான் பிரான்சிஸ்கோ: எலான் மஸ்க், ட்விட்டர் நிறுவனத்தை வாங்கியதிலிருந்து, அதில் பல்வேறு மாற்றங்கள் நிகழ்த்தப்பட்டு வருகிறது. அந்த வகையில், அதிகாரப்பூர்வ ட்விட்டர் கணக்குகளின் டிக் நிறத்தை அந்நிறுவனம் மாற்றி அமைத்தது. அதன்படி, தனிநபரின் அதிகாரப்பூர்வ கணக்கிற்கு நீலம் (Blue), வணிக கணக்குகளுக்குத் தங்க நிறம் (Gold) மற்றும் அரசு சார்ந்த கணக்குகளுக்குச் சாம்பல் நிற (Gray) டிக்குகளை வழங்கியது.
மேலும் இதற்காக மாதந்தோறும் வசூலிக்கும் சந்தா தொகையும் உயர்த்தப்பட்டது. இந்த நிலையில் ட்விட்டர் புளூவை சமீபத்தில் இந்தியாவிலும் அறிமுகப்படுத்தியது. இதனால் ட்விட்டர் புளூ, இந்தியா, அமெரிக்கா, கனடா, ஜப்பான், ஆப்பிரிக்கா, சவுதி அரேபியா, பிரேசில் மற்றும் இந்தோனேசியா உள்பட 15 சர்வதேச நாடுகளில் அறிமுகப்படுத்தப்பட்டுள்ளன.
தற்போது இந்திய பயனர்கள், இணையதளத்தில் புளூ டிக் ட்விட்டரை பயன்படுத்துவதற்கு மாதம் 650 ரூபாய் செலுத்த வேண்டும் எனவும், ஆண்டிராய்டு மற்றும் ஐஓஎஸ் மொபைலில் புளூ டிக் ட்விட்டரை பயன்படுத்துவதற்கு மாதம் 900 ரூபாய் செலுத்த வேண்டும் எனவும் அந்நிறுவனம் அறிவித்துள்ளது.
ஏற்கனவே மாதம் 566.67 ரூபாய் வீதம், வருடம் 6,800 ரூபாய் ஆண்டுச் சந்தாவை வழங்கி இருந்தது. அதேநேரம் தங்க நிற டிக் ட்விட்டர் பயனர்கள், மாதம் 1,000 டாலர்கள் செலுத்த வேண்டும் என்பது குறிப்பிடத்தக்கது.
இதையும் படிங்க: புதிய பிங் பிரௌசரை அறிமுகம் செய்த மைக்ரோசாஃப்ட்!
