சீன அரசு ஏப்ரல் 3ஆம் தேதி குற்றவாளிகளை விசாரணைக்காக ஹாங்காங்கிலிருந்து நாடு கடத்த வழிவகை செய்ய புதிய மசோதாவைத் தாக்கல் செய்தது. ஹாங்காங் மக்கள் இந்த மசோதாவை எதிர்த்துக் கடும் போராட்டத்தை மேற்கொண்டனர்.
கடந்த வாரம் நடைபெற்ற ஒரு போராட்டத்தில் காவல் துறையினருக்கும் போராட்டக்காரர்களுக்கும் இடையே வன்முறை வெடித்தது. அதில் பங்கேற்ற போராட்டக்காரர்கள் கைது செய்யப்பட்டனர். பின் சீன அரசு அந்த மசோதாவை தேதி குறிப்பிடாமல் ஒத்திவைத்தது.
இந்நிலையில் மசோதாவை முற்றிலும் திரும்பப் பெற வேண்டும், முந்தைய போராட்டத்தில் கைது செய்தவர்களை விடுவிக்க வேண்டும் உள்ளிட்ட கோரிக்கைகளை வலியுறுத்தி நேற்று திடீரென்று வான் சாய் பகுதியிலுள்ள சீன ஆயுதக்கிடங்கு காவல் நிலையத்தை மக்கள் முற்றுகையிட்டனர்.
காவலர்கள் அனைவரும் கிடங்கினுள் மாட்டிக்கொண்டதால் போராட்டத்தைக் கலைக்க முடியவில்லை. 15 மணி நேர முற்றுகைக்குப் பின் நள்ளிரவு 2.30-க்கு இந்தப் போராட்டம் முடிவுக்கு வந்தது.
