கரோனா தாக்கமானது உலகின் வல்லரசாகக் கருதப்படும் அமெரிக்காவில் கடுமையான பாதிப்பை ஏற்படுத்தியுள்ளது. 1918ஆம் ஆண்டு ஏற்பட்ட ஸ்பானிஷ் காய்ச்சல் பெருந்தொற்றை விட கரோனாவின் தாக்கம் தீவிர பாதிப்பை ஏற்படுத்தியுள்ளதாக மருத்துவ வல்லுநர்கள் தெரிவிக்கின்றனர்.
இதுவரை அந்நாட்டில் கரோனாவால் 6.44 லட்சம் பேர் பாதிப்பக்கபட்டுள்ள நிலையில், 28 ஆயிரத்துக்கும் மேற்பட்டோர் உயிரிழந்துள்ளனர். கரோனா நோய் தொற்று பரவலுக்குப்பின் இதுவரை இல்லாத அளவு அமெரிக்காவில் ஒரே நாளில் மட்டும் 2 ஆயிரத்து 600 பேர் உயிரிழந்தனர்.
வரும் நவம்பர் மாதம் தேர்தலைச் சந்திக்கும் அதிபர் ட்ரம்புக்கு இந்த கரோனா வைரஸ் தொற்று பெரும் தலைவலியை ஏற்படுத்தியுள்ளது. கரோனா தடுப்பு நடவடிக்கை குறித்து ட்ரம்பின் மீது ஜனநாயக கட்சியினரும், ஊடகங்களும் தொடர் விமர்சனங்களை முன்வைக்கின்றன.
இதையடுத்து கரோனா நிவாரண நிதியை அங்கு தாராளமாக வழங்கிவரும் ட்ரம்ப், முதல் கட்டமாக ஏழு கோடி மக்களுக்கு நிவாரணப் பொருட்களை அனுப்பி வைக்கிறார். இந்தப் பொருட்கள் அனைத்திலும் தனது பெயர் கட்டாயம் அச்சிடப்பட்டிருக்க வேண்டும் என அவர் தெரிவித்துள்ளார். அரசியல் ரீதியாக தனக்கு ஏற்பட்டுள்ள பின்னடைவை சரிகட்ட, இந்த நடவடிக்கையை மேற்கொண்டுள்ளதாகத் தெரிவிக்கப்பட்டுள்ளது.
பேரிடர் கால நிவாரணப் பொருட்களில் தங்கள் அடையாளங்களை வெளிப்படுத்தும் இந்திய அரசியல் கட்சிகள் மீது தொடர் விமர்சனம் வைக்கப்படும் நிலையில், அமெரிக்கவும் இந்தியாவை தற்போது பின்பற்றத் தொடங்கியது பேசு பொருளாக மாறியுள்ளது.
இதையும் படிங்க: தென் கொரியா தேர்தலில் ஆளும் அரசு அபார வெற்றி
